Mərakeş Seutada miqrantlara qarşı zorakılıq iddialarının araşdırılmasını tələb edib
Bakı, 3 avqust, AZƏRTAC
Mərakeş insan hüquqları təşkilatı İspaniyanın Seuta muxtar şəhərində miqrantlara qarşı zorakılıq hallarının araşdırılmasını tələb edib.
AZƏRTAC xarici mediaya istinadla xəbər verir ki, təşkilat həmçinin Seutada baş verən miqrant böhranı zamanı itkin düşən şəxslərin taleyinin müəyyənləşdirilməsi üçün təcili tədbirlər görülməsinə çağırıb.
Bəyanatda itkin düşən şəxslərin sayının çox olduğu, onların ailələrinin yaxınları barədə məlumat gözlədiyi bildirilib. Təşkilat, həmçinin çoxsaylı ölüm halları, şəxsiyyəti müəyyən edilməmiş şəxslərin müəyyənləşdirilməsində çətinliklər və bəzi miqrantlara qarşı zorakılıq iddialarına diqqət çəkib.
Mərakeş təşkilatı İspaniya hökumətini Seutaya daxil olmağa cəhd edən və ya şəhərə çatdıqdan sonra itkin düşən şəxslərin taleyinin araşdırılmasına, eləcə də zorakılıqla bağlı məlumatların yoxlanılmasına çağırıb.
Daha əvvəl Seutaya daxil olan bəzi miqrantların yerli sakinlər və şəhər rəsmiləri tərəfindən düşmən münasibətlə qarşılaşdıqları bildirilmişdi. Bəzi miqrantlar geri qayıtdıqdan sonra əsas ehtiyaclarının ödənilmədiyini iddia ediblər.
Bölmənin digər xəbərləri
