Mərkəzi Bank: 2025-ci ildə illik inflyasiyanın 3.4 faiz olacağı proqnozlaşdırılır
Bakı, 1 noyabr, AZƏRTAC
İllik inflyasiyanın 2023-cü ilin sonuna 4.3 faiz, 2024-cü ildə 5.3 faiz, 2025-ci ildə isə 3.4 faiz olacağı proqnozlaşdırılır.
AZƏRTAC xəbər verir ki, cari ildə ardıcıl olaraq bir neçə proqnoz yenilənməsində 2024-cü il və 2025-ci ilə inflyasiya proqnozları hədəf diapazonunda olub. Ümumilikdə inflyasiya mühitində azaldıcı amillərin güclənməsi və inflyasiya gözləntilərinin sabitləşməsi ilin sonuna və 2024-cü ilə illik inflyasiyanın hədəf daxilində formalaşmasını proqnozlaşdırmağa əsas verir. Mərkəzi Bankın oktyabr proqnozlarına görə, inflyasiyanın ortamüddətli dövrdə hədəf diapazonunda olacağı gözlənilir.
Mərkəzi Bankın pul siyasəti ilə bağlı növbəti qərarları proqnozlaşdırılan inflyasiyanın hədəflə müqayisəsi və yenilənmiş makroiqtisadi proqnozlar nəzərə alınmaqla veriləcək. Yuxarıda qeyd olunan xarici və daxili mühitlə bağlı risklərin reallaşmadığı və manatın möhkəmlənməsi təzyiqləri səngimədiyi halda pul siyasətinin mərhələlərlə yumşaldılması imkanlarına baxılacaq.
Bölmənin digər xəbərləri
