Mərkəzi Elmi Kitabxanada soyqırımı qurbanlarının xatirəsi anılıb
Bakı, 26 fevral, AZƏRTAC
Azərbaycan Milli Elmlər Akademiyasının Mərkəzi Elmi Kitabxanasında (MEK) Xocalı faciəsi qurbanlarının xatirəsini anma tədbiri keçirilib.
Kitabxanadan AZƏRTAC-a bildiriblər ki, tədbirdə MEK-in direktoru Leyla İmanova Azərbaycanın haqq səsinin eşidiləcəyinə, Xocalı qətliamının təqsirkarlarının haqlı cəzalarına çatacaqlarına, işğal altındakı torpaqlarımızın tezliklə yağı düşməndən azad olunacağına əminliyini ifadə edib.
Tədbirdə Azərbaycan tarixinin ən qanlı hadisələrdən olan Xocalı faciəsi haqqında geniş məlumat verilib. Çıxış edənlər Xocalı faciəsinin insanlığa qarşı misli görünməyən vəhşət olduğunu söyləyiblər.
Qeyd edilib ki, Xocalı faciəsi erməni silahlı dəstələri tərəfindən azərbaycanlılara qarşı xüsusi amansızlıqla törədilən cinayət hadisəsidir. Həmin gecə dinc və günahsiz əhali xüsusi qəddarlıqla qətlə yetirilib, əsir götürülən soydaşlarımız müxtəlif işgəncə və təhqirlərə məruz qalıblar. Xocalı kimi tarixi bir məkanın yer üzündən silinməsində keçmiş Sovet ordusunun 366-cı motoatıcı alayının fəal iştirakı olub.
Mərasimdə Xocalı soyqırımına həsr olunan “Xəcalət” tamaşasından parçalar təqdim edilib.
Bölmənin digər xəbərləri
