ELM VƏ TƏHSİL
“Metafizika” jurnalının yeni nömrəsi çap olunub
Bakı, 14 mart, AZƏRTAC
“Metafizika” beynəlxalq fəlsəfi və fənlərarası araşdırmalar jurnalının 17-ci nömrəsi işıq üzü görüb.
AMEA-dan AZƏRTAC-a bildirilib ki, nəşrin bu sayında Azərbaycan dili ilə yanaşı, başqa dillərdə də məqalələr yer alıb. Belə ki, jurnalda “Sədrəddin Şirazinin fəlsəfi çevrilişi”, “Xarici dil öyrənməyin əsasları”, “Azərbaycanın elm tarixi üzrə yazılı qaynaqları (X-XIV əsrlər)”, “Yunus Əmrə fəlsəfəsində insan problemi”, “Dövlətin ərazi bütövlüyü və “xalqların öz müqəddəratını təyinetmə hüququ” prinsipi”, “Əməliyyat-axtarış fəaliyyətinə prokuror nəzarətinin təkmilləşdirilməsi məsələsi haqqında”, “Məhkəmə ekspertizası sübutlarının tədqiqində keyfiyyət standartları”, “Nihilizmdən qurtulmanın mümkünlüyü və Mürtəza Mütəhhərinin hikmət paradiqması”, “Həzrət Musa və Xızırın hekayəsinin şübhələrə cavab verməsi ilə tədqiqi” adlı məqalələr yer alıb.
Qeyd edək ki, müxtəlif ölkələrdən tanınmış alimlərin təmsil olunduğu jurnalın baş redaktoru dosent Ələddin Məlikovdur. Altı dildə (Azərbaycan, ingilis, rus, türk, ərəb və fars) məqalələrin qəbul edildiyi jurnalda fəlsəfi, sosioloji, psixoloji, tarix, hüquq, siyasi elmlər, iqtisadiyyat, filologiya və pedaqogika tədqiqatlarına yer verilir.
“Metafizika jurnalı” “International Index Copernicus”, “Ideal Online”, “Ebsco”, “TEİ”, “CiteFactor”, “SID”, “Advanced Science Index” və digər nüfuzlu impakt faktorlu indekslərlə yanaşı, Azərbaycan Respublikasının Prezidenti yanında Ali Attestasiya Komissiyasının tövsiyə etdiyi elmi nəşrlər sırasında da qeydiyyata alınıb.