Özbəkistanda antikorrupsiya tədbirləri həyata keçirilib
Bakı, 25 may, AZƏRTAC
Özbəkistan Prezidenti Şavkat Mirziyoyevin fərmanı ilə dövlət qulluqçusu ilə sahibkarlıq subyekti arasında əlaqələrin etibarlılığını qiymətləndirmək səlahiyyəti daxili antikorrupsiya nəzarəti orqanlarına həvalə edilib.
AZƏRTAC rəsmi UZA agentliyinə istinadla xəbər verir ki, Özbəkistanın Korrupsiyaya Qarşı Mübarizə Agentliyinin mətbuat xidmətindən verilən məlumata görə, daxili nəzarət orqanları tərəfindən aparılan 11.953 araşdırma, monitorinq və nəzarət tədbirləri zamanı 969,5 milyard sum dəyərində maliyyə səhvləri və çatışmazlıqlar aşkar edilib. Bu məsələlərin həlli üçün tədbirlər görülüb və 150,1 milyard sum vəsaitin mənimsənilməsinin qarşısı alınıb.
Məlumatda qeyd olunur ki, hüquq-mühafizə və tənzimləyici orqanların məktublarına əsasən, 871 daxili audit aparılıb və onların 843-ü daxili nəzarət orqanları tərəfindən başlanılıb. Hökumət orqanlarının əməkdaşlarına qarşı 154 cinayət, 14 inzibati və 323 intizam tənbehi cəzaları tətbiq edilib, həmçinin 67 halda əmək müqavilələri ləğv olunub.
Daxili nəzarət orqanları tərəfindən öz təşəbbüsü ilə aparılan daxili auditlərin nəticələrinə əsasən işçilərə 31 cinayət, 9 inzibati və 311 intizam tənbehi cəzaları tətbiq edilib, 1201 halda isə əmək müqavilələri ləğv olunub.
Bölmənin digər xəbərləri
