WUF13 Bakının beynəlxalq dialoq və əməkdaşlıq məkanı kimi rolunu bir daha təsdiqlədi - ŞƏRH
Bakı, 25 may, AZƏRTAC
WUF13-ün Bakıda keçirilməsi Azərbaycanın son illərdə beynəlxalq tədbirlərin təşkilində qazandığı təcrübənin və etibarlı tərəfdaş kimi formalaşmış mövqeyinin növbəti göstəricisi oldu. COP29-dan sonra belə genişmiqyaslı bir forumun ölkəmizdə keçirilməsi Bakının qlobal müzakirələr üçün mühüm platformalardan birinə çevrildiyini bir daha nümayiş etdirdi.
Bu sözləri AZƏRTAC-a açıqlamasında Beynəlxalq Avrasiya Mətbuat Fondunun prezidenti Umud Mirzəyev söyləyib.
O bildirib ki, WUF13 günlərində Bakı müxtəlif ölkələrdən gələn nümayəndələrin, şəhərsalma üzrə mütəxəssislərin, beynəlxalq təşkilatların, dövlət qurumlarının və vətəndaş cəmiyyəti təmsilçilərinin görüş yerinə çevrildi. Burada yalnız şəhərlərin fiziki inkişafı deyil, insanların təhlükəsiz, sağlam və ləyaqətli mühitdə yaşaması, dayanıqlı infrastrukturun qurulması, yaşıl yanaşmaların tətbiqi və icmaların gələcək inkişafı kimi məsələlər müzakirə olundu.
"Azərbaycan WUF13 çərçivəsində öz təcrübəsini də geniş şəkildə təqdim etdi. Müasir şəhərsalma prosesində tarixi və memarlıq irsinin qorunması, işğaldan azad edilmiş ərazilərdə aparılan bərpa və quruculuq işləri, keçmiş məcburi köçkünlərin doğma yurdlarına qayıdışı, “ağıllı şəhər” və “ağıllı kənd” konsepsiyalarının tətbiqi ölkəmizin Forum gündəliyinə verdiyi əsas töhfələr sırasında idi.
İşğaldan azad edilmiş ərazilərdə aparılan bərpa prosesi xüsusi əhəmiyyət daşıyır. Bu proses sadəcə yeni yolların, binaların və infrastruktur obyektlərinin tikilməsi ilə məhdudlaşmır. Söhbət illərlə dağıdılmış şəhər və kəndlərdə həyatın yenidən qurulmasından, təhlükəsiz yaşayış mühitinin yaradılmasından və insanların öz torpaqlarına ləyaqətlə qayıtması üçün real şəraitin formalaşdırılmasından gedir. Urbisidə, ekosidə və kultursidə məruz qalmış ərazilərin yenidən dirçəldilməsi Azərbaycanın bu sahədə həm siyasi iradəsini, həm də praktiki imkanlarını ortaya qoyur.
WUF13 zamanı Azərbaycan QHT-lərinin fəallığı da diqqətçəkən məqamlardan biri oldu. Qeyri-Hökumət Təşkilatlarına Dövlət Dəstəyi Agentliyinin yaratdığı imkanlar və Qlobal Cənub QHT Platformasının təqdim etdiyi beynəlxalq əməkdaşlıq mühiti vətəndaş cəmiyyəti institutlarının Forumda daha görünən və məzmunlu iştirakına şərait yaratdı. QHT nümayəndələri müxtəlif panel müzakirələrində, yan tədbirlərdə və görüşlərdə iştirak edərək şəhərsalma, humanitar minatəmizləmə fəaliyyəti, ekoloji çağırışlar, icmaların inkişafı və dayanıqlı bərpa mövzularında öz baxışlarını bölüşdülər. Bu iştirak göstərdi ki, vətəndaş cəmiyyəti artıq bu cür qlobal platformalarda yalnız izləyici mövqeyində dayanmır; əksinə, müzakirələrə konkret məzmun gətirir, yerli təcrübəni beynəlxalq tərəfdaşlarla bölüşür və yeni əməkdaşlıq imkanlarının formalaşmasına töhfə verir", - deyə BAMF-ın prezidenti vurğulayıb.
Onun sözlərinə görə, Azərbaycanın təşəbbüsü ilə "Bakı Şəhər Mükafatı"nın təsis olunması da ölkəmizin qlobal urbanizasiya gündəliyinə verdiyi töhfənin davamıdır. Bu mükafat şəhərlərin inkişafı sahəsində uğurlu təcrübələrin tanıdılması, yenilikçi yanaşmaların təşviqi və beynəlxalq əməkdaşlığın gücləndirilməsi baxımından əhəmiyyətlidir.
Umud Mirzəyev qeyd edib ki, WUF13-ün təşkilində tətbiq edilən yanaşmaların beynəlxalq səviyyədə yüksək qiymətləndirilməsi ayrıca vurğulanmalıdır. Dövlət Şəhərsalma və Arxitektura Komitəsi ilə BMT-nin Məskunlaşma Proqramı arasında imzalanmış Niyyət Məktubu gələcək forumların təşkili zamanı Bakı təcrübəsinin nəzərə alınacağını göstərir. Bu sənəd Azərbaycanın böyük beynəlxalq tədbirlərin təşkili sahəsində artıq özünəməxsus standart formalaşdırdığını təsdiqləyir.
“Bakı beynəlxalq müzakirələr üçün açıq, çevik və etibarlı məkan olduğunu bir daha göstərdi. WUF13 həm Azərbaycanın şəhərsalma və bərpa sahəsində təcrübəsinin təqdimatı, həm də qlobal tərəfdaşlıqların genişləndirilməsi baxımından mühüm platformaya çevrildi.
Bölmənin digər xəbərləri
