Madriddə kirayə haqlarının artması kütləvi etirazlara səbəb olub
Bakı, 25 may, AZƏRTAC
İspaniyanın paytaxtında 23 mindən çox insanın iştirak etdiyi böyük mitinq keçirilib. Etirazçılar artan kirayə haqlarının həlli üçün hökumətin müdaxiləsini tələb edirlər.
AZƏRTAC İspaniya mediasına istinadla xəbər verir ki, insanlar Atoca vağzalından yürüş edərək Madridin mərkəzində nəqliyyatın hərəkətini dayandırıblar.
Son beş ildə Madriddə ailəvi mənzillərin qiyməti 50 faizdən çox bahalaşıb və hazırda orta kirayə haqqı ayda 1500 avronu ötüb.
Bildirilir ki, bir çox ispan ailəsi üçün bu, ağır yükə çevrilib və onları gəlirlərinin 70 faizindən çoxunu mənzil kirayəsinə ödəməyə məcbur edib. Buna görə də fəallar hakimiyyətdən təsirli tədbirlər görməsini, kirayə qiymətlərini məcburi şəkildə azaltmasını istəyirlər.
Mütəxəssislər və yerli sakinlər mövcud böhranın əsas səbəbi kimi turistlərin böyük axınını göstərirlər. Mənzilləri gündəlik olaraq onlayn platformalar vasitəsilə kirayəyə vermək daha sərfəli hala gəlib. Bu da yerli sakinlərin uzunmüddətli kirayə mənzil tapmasını çətinləşdirib və qiymətlər kəskin şəkildə artıb.
Bölmənin digər xəbərləri
