MİLLİ ELMLƏR AKADEMİYASININ 60 İLLİK YUBİLEYİ NAXÇIVANDA QEYD OLUNUR
AZƏRTAC xəbər verir ki, Azərbaycan Respublikasının Prezidenti İlham Əliyevin “Azərbaycan Milli Elmlər Akademiyasının 60 illik yubileyi haqqında” Sərəncamına uyğun olaraq AMEA-nın Naxçıvan bölməsində elmi konfrans keçirilmişdir.
Konfransı AMEA-nın Naxçıvan bölməsinin sədri, akademik İsmayıl Hacıyev açaraq, Milli Elmlər Akademiyasının 60 ildə keçdiyi tarixi yola nəzər salmış, əldə olunmuş nailiyyətlərdən danışmışdır.
Natiq ümummilli liderimiz Heydər Əliyevin Naxçıvan Muxtar Respublikasında elmi-tədqiqat qurumlarının fəaliyyətini əlaqələndirmək, mövcud elmi potensialdan səmərəli istifadə etmək, Naxçıvanın tarixi, arxeologiyası və təbii sərvətlərinin öyrənilməsi üçün daha əlverişli şərait yaratmaq məqsədi ilə “AMEA-nın Naxçıvan bölməsinin yaradılması haqqında” tarixi Sərəncamın əhəmiyyətindən, ötən dövr ərzində görülmüş işlərdən söhbət açmışdır.
Konfransda “Azərbaycan elminin baş qərargahı”, “Müqəddəs elm məbədi”, “Naxçıvan MR ərazisində botaniki tədqiqatlar tarixi”, “60 ildə Naxçıvan MR dialekt, şivə və yer adlarının öyrənilməsi”, “Azərbaycanda kimyanın inkişaf istiqamətləri”, “XX əsrdə Azərbaycan astronomiya elminin inkişaf tarixi” mövzularında məruzələr dinlənilmişdir.
Məruzə və çıxışlarda Azərbaycan elm, təhsil və mədəniyyətinin dünya elminə birbaşa inteqrasiyasında və cəmiyyətin inkişafında Milli Elmlər Akademiyasının rolu yüksək qiymətləndirilmişdir.
Bölmənin digər xəbərləri
