Sentyabrın 6-da Milli Olimpiya Komitəsinin prezidenti, Milli Məclisin deputatı İlham Əliyev Azərbaycan Qılıncoynatma Federasiyasının rəhbərliyi və idmanın bu növü üzrə qadınlardan ibarət yığma komandanın üzvləri ilə görüşmüşdür. 

İlham Əliyev idmançıları düyna çempionatında uğurlu çıxışları münasibətilə təbrik edərək bildirdi ki, indi Azərbaycan qılıncoynatma məktəbi dünyada ən yaxşılardan biridir. Hazırda biz kişilər arasında aparıcı yer tutmasaq da, qadınlardan ibarət yığma komandamıza tay komandalar dünyada az tapılar. Yelena Jemayevanı xüsusi qeyd etmək istərdim. O, ikiqat dünya çempionu, Avropa çempionudur və artıq iki ildir dünyanın ən yaxşı qadın qılıncoynadanlarının reytinqində birinci yeri tutur, özünün ən yaxın rəqiblərini böyük fərqlə geridə qoyur. Azərbaycan idmançısı bu yaxınlarda Lissabonda, qılıncoynatma üzrə növbəti dünya çempionatında gümüş medal qazanmışdır. O, bütün rəqiblərini məğlubiyyətə uğradaraq, yalnız həlledici görüşdə Çin idmançısı Hue Tana uduzmuşdur.

MOK-un prezidenti bildirdi ki, qadınlar arasında qılıncoynatma yarışları olimpiya oyunlarının proqramına daxil edilmişdir. Odur ki, bu oyunlarda uğurla çıxış etmək üçün idmançılar maksimum səy göstərməlidirlər. İdmançılarımızın Afinada ölkəmizi layiqincə təmsil etməsi üçün MOK tərəfindən onlara hər cür şərait yaradılacaqdır. İlham Əliyev dedi ki, o, qızlarımızın dünya çempionatında çıxışlarını diqqətlə izləyirdi və hakimlərin idmançılarımıza qarşı yenə də ədalətsizliyinə baxmayaraq, onlar layiqincə çıxış etdilər.

Yelena Jemayeva səmimi sözlərə görə MOK-un prezidentinə təşəkkür etdi, məşğul olmasına baxmayaraq, onlarla görüşməyə vaxt tapdığına görə minnətdarlığını bildirdi. O dedi: Dövlətin, MOK rəhbərliyinin bizi daim dəstəklədiyini hiss edirik, məşqlərimiz üçün yaxşı şərait yaradılmışdır. Lakin Azərbaycanda səmərəli məşq etmək üçün kifayət qədər güclü rəqiblər yoxdur, buna görə də biz təlim toplanışları keçirməkdən ötrü respublikamızdan kənara getməli oluruq.

Qılıncoynatma üzrə Azərbaycan yığma komandasının məşqçisi Yaşar Məmmədov MOK-un prezidentini əmin edərək dedi ki, qızlarımız Afina olimpiadasında medal qazanacaqlar.

Sonda görüş iştirakçıları xatirə şəkli çəkdirdilər.

X X X

Sonra Milli Olimpiya Komitəsinin prezidenti İlham Əliyev jurnalistlərə müsahibə verdi.

SUAL: İlham müəllim, son illər idman sahəsində qazanılan uğurları necə qiymətləndirirsiniz və bu görüş haqqında nə deyə bilərsiniz?

CAVAB: Bəli, uğurlarımız davam edir. İdmançılarımız müxtəlif yarışlarda uğurlar qazanırlar və qılıncoynatmada da bu cür uğurlarımız vardır. Mən Yelena Jimayeva ilə çoxdan tanışam. Həyat yoldaşı İlqar Məmmədov iki dəfə olimpiya çempionudur. Onu Azərbaycana dəvət edəndə mənə bildirmişdir ki, artıq öz idman fəaliyyətini başa çatdırır. Amma onun həyat yoldaşı bu idman növü ilə məşğul olur. Mən ondan xahiş etdim ki, Azərbaycana gəlsin və Azərbaycanı təmsil etsin. Çox şadam ki, indi o, çox uğurla çıxış edir, böyük qələbələr qazanır.

Bildiyiniz kimi, qılıncoynatma növü artıq olimpiya oyunlarının proqramına daxil olubdur. Güman edirəm ki, Yelena gələcəkdə keçiriləcək olimpiya oyunlarında yüksək nəticələr göstərəcəkdir. Bu, bir daha onu sübut edir ki, Azərbaycanda idman hərtərəfli inkişaf edir. Həm ənənəvi idman növlərində, həm də bizim üçün yeni olan növlərdə böyük uğurlar vardır.

SUAL: İlham müəllim, bu görüş əlamətdar günlərə təsadüf edir. Sabah Azərbaycanın yığma komandası İtaliyanın milli komandası ilə görüşəcəkdir. Ümumiyyətlə, Azərbaycan müxtəlif beynəlxalq yarışlarda iştirak edib və biz bunların şahidi olmuşuq, Bakıda belə yarışlar keçirilibdir. Tofiq Bəhramov adına stadion, eləcə də Azərbaycan Dövlət Bədən Tərbiyəsi və idman Akademiyasının stadionu yenidən bərpa olunubdur və belə mötəbər yarışa tam hazırdır. Biz dünən İtaliyanın olimpiya komandasının üzvləri ilə söhbət edəndə onlar stadionların vəziyyətini yüksək qiymətləndirdilər. Bu barədə nə deyə bilərsiniz?

CAVAB: Elədir. Bilirsiniz ki, biz böyük quruculuq işləri aparırıq. Azərbaycanda yeni müasir idman kompleksləri tikirik, mövcud olan idman qurğularını təmir edirik. Məsələn, bizim böyük İdman- konsert kompleksini əsaslı təmir etdirdik və indi ən yüksək dünya standartlarına cavab verir. Eyni zamanda Bakıda, Azərbaycanın müxtəlif bölgələrində yeni idman kompleksləri tikilir və bundan sonra da tikiləcəkdir. Beləliklə, Azərbaycanın hər bir bölgəsində idmanla məşğul olmaq üçün gözəl şərait olacaqdır.

O ki qaldı Tofiq Bəhramov adına respublika stadionuna, biz müxtəlif şirkətlərə, hardasa, altı ay bundan əvvəl müraciət etmişdik. Onların köməyi ilə, sponsorluğu ilə Tofiq Bəhramov adına stadion artıq dünya standartlarına çatdırılıbdır.

Eyni zamanda, Azərbaycan Dövlət Bədən Tərbiyəsi və İdman Akademiyasının buradan, pəncərədən görünən stadionu da, əgər xatırlayırsınızsa, çox bərbad bir vəziyyətdə idi. Oturacaqlar yox idi, örtük də çox pis vəziyyətdə idi, qaçış zolağı da yox idi. Amma indi bunu əsaslı təmir etdirdik. Beləliklə, burada həm tələbələr, həm də idmançılar məşq edəcəklər və edirlər. Əgər oranı buradan çəksəniz görərsiniz ki, çox gözəl görkəmi var. Bunlar çox geniş miqyaslı işlərdir.

Əlbəttə, biz çalışırıq ki, bütün idman qurğularını dünya standartlarına çatdıraq və yenilərini də yaradaq ki, idmançılarımızın yaxşı məşq etməsi, yaxşı çıxış etməsi üçün lazımi şərait olsun. Bu da öz nəticələrini verir. Əgər bunlar olmasaydı, yəqin ki, Azərbaycanın idmançıları beynəlxalq yarışlarda bu qədər böyük qələbələr qazana bilməzdilər.

SUAL: Sizin sabahkı görüşlə bağlı proqnozunuzu bilmək olarmı?

CAVAB: Proqnoz vermək çətindir. Amma, əlbəttə, mən arzu edirəm ki, bizim yığma komandamız yaxşı futbol göstərsin, Azərbaycanı layiqli təmsil etsin. Bilirsiniz ki, Azərbaycanda bu görüşə nə qədər böyük maraq var.

Əlbəttə, İtaliya kimi üçqat dünya çempionu olan komanda ilə görüşmək çox çətindir. Bizim komandamız, təbii, o səviyyədə deyildir. Amma ümid edirəm futbolçularımızın iradəsi, mətanəti onlara imkan verəcək ki, yüksək oyun nümayiş etdirsinlər. Ən önəmlisi isə daim yadda saxlasınlar ki, bütün Azərbaycan onlara azarkeşlik edəcək və onlardan yüksək nəticə gözləyəcəkdir. O cümlədən mən də. Mən idmançılara, bütün futbolçulara qələbə, uğurlar arzulayıram.

X X X

Görüşdə gənclər, idman və turizm naziri Əbulfəz Qarayev, Azərbaycan Qılıncoynatma Federasiyasının prezidenti Fərhad Əliyev iştirak edirdilər.

AzərTAC

Foto İlqar Cəfərovundur