Cənab Ali baş komandan!

Hörmətli qonaqlar!

Bu gün Azərbaycan Respublikası Milli Təhlükəsizlik Nazirliyinin şəxsi heyəti və hər birimiz üçün böyük sevinc və iftixar doğuran gündür. Çünki bu gün xalqımızın ümummilli lideri Heydər Əliyevin adını daşıyan Akademiyada ulu öndərımizin nəsillərə örnək olan titanik fəaliyyətini əks etdirən “Şöhrət” muzeyinin və onun xatirəsinə ucaldılmış abidənin açılış mərasimidir. Bu gün bizim üçün həm də onunla önəmlidir ki, muzeyin açılışında ümummilli liderimizin siyasi varisi, Heydər Əliyev məktəbinin ən layiqli yetirməsi, Ali baş komandanımız cənab İlham Əliyev iştirak edir.

Ömrünün 25 ilini xüsusi xidmət orqanında fəaliyyətə həsr etmiş, daim milli qurtuluş duyğuları ilə yaşamış Heydər Əliyevin həyat yolunu nümayiş etdirən “Şöhrət” muzeyi, həm də Azərbaycanın milli təhlükəsizlik orqanlarının, eləcə də ölkəmizin inkişaf tarixini özündə əks etdirir.

Dövlətçilikdə varislik prinsipinə xüsusi önəm verən ümummilli liderimiz Heydər Əliyevin 1997-ci ilin 23 mart tarixli Sərəncamı ilə martın 28-i Azərbaycanın təhlükəsizlik orqanları əməkdaşlarının peşə bayramı günü kimi hər il böyük təntənə ilə qeyd olunur.

Ümummilli liderimizin təhlükəsizlik orqanlarına və ölkəyə rəhbərlik etdiyi illərdə Azərbaycanda görülmüş işlərin miqyası barədə söhbət açmaq sözün əsil mənasında böyük vaxt tələb edir. Ancaq mən bu tarixi xidmətlərin arasında bizim orqanlara bilavasitə aidiyyəti olan bir məsələni xüsusi qeyd etmək istərdim. Məhz onun müstəsna yüksək vətənpərvərliyi və vətəndaş cəsarəti nəticəsində həmin illərdə təhlükəsizlik orqanlarının milli kadr potensialı formalaşmağa başlamışdır. Heydər Əliyev SSRİ-nin mövcudluğu dövründə Azərbaycanın görkəmli elm, mədəniyyət, ictimai xadimlərini siyasi təqiblərdən, amansız repressiyalardan qorumaqla milli maraqların müdafiəsi sahəsində hələ o illərdə xalqa tarixi xidmətlər göstəribdir.

Ölkəmizin ictimai-siyasi, sosial-iqtisadi həyatının elə bir sahəsi yoxdur ki, onun təşəkkül tapmasında, inkişafında və yüksəlməsində ümummilli lider Heydər Əliyevin rolu olmasın. Bu baxımdan, dövlətçiliyimizin möhkəmlənməsində, ümumən milli maraqların etibarlı qorunmasında önəmli yeri olan milli təhlükəsizlik orqanlarının inkişaf yolu istisna təşkil etmir.

Bu gün biz qürurla bəyan edirik ki, milli maraqların qorunmasında Heydər Əliyev ənənələrinin, amallarının yaşadılması, ən başlıca uğurumuz və hazırda fəaliyyətimizin əsas prioritet istiqamətidir. Onların ən əsasları aşağıdakılardır: Azərbaycanda sabitliyin, dövlət müstəqilliyinin əbədiliyinin və dönməzliyinin qorunması, Ermənistanın işğal etdiyi ərazilərin azad olunması, Azərbaycan Respublikasının hərtərəfli inkişaf etdirilməsi.

Dönməz müstəqillik və dövlətçilik xətti bu gün dövlət quruculuğunun müasirləşmə və yeniləşmə mərhələsində möhtərəm Prezidentimiz İlham Əliyev tərəfindən ardıcıl surətdə və uğurla davam etdirilir.

Milli Təhlükəsizlik Nazirliyində baş verən ciddi dəyişikliklər, maddi-texniki bazanın möhkəmləndirilməsi, iş şəraitinin yaxşılaşdırılması və sair vacib məsələlər ölkə başçısının göstərdiyi xüsusi qayğının nəticəsidir. Son vaxtlar digər müsbət dəyişikliklərlə yanaşı, əməkdaşların sosial müdafiəsi gücləndirilmiş, nazirlikdə əmək haqları, habelə hərbi rütbəyə görə maaş artırılmış, xeyli əməkdaş yeni mənzillərlə təmin edilmişdir.

Bununla yanaşı, Milli Təhlükəsizlik Nazirliyinin Akademiyasına xalqımızım ümummilli lideri Heydər Əliyevin adının verilməsi, Akademiyanın Döyüş bayrağı haqqında Əsasnamənin və onun təsvirinin təsdiq edilməsi şəxsi heyət tərəfindən böyük ruh yüksəkliyi ilə qarşılanmışdır. Son vaxtlar nazirlikdə hər bir sahədə işlərin daha da canlanması üçün mühüm stimul olmuş, terror-təxribat fəaliyyətlərinin qarşısının alınmasında və mütəşəkkil cinayətkarlığın digər təzahürlərinə qarşı mübarizədə uğurlu nəticələr əldə edilmişdir.

Nazirliyin həyata keçirdiyi əməliyyat-axtarış tədbirləri nəticəsində beynəlxalq terrorçu təşkilatlarla əlaqələri olan, yerli və xarici vətəndaşlardan ibarət təhlükəli cinayətkar qruplar ifşa edilərək zərərsizləşdirilmişlər. Eyni zamanda, təcavüzkar separatçılığa və dini ektremizmə qarşı mübarizəyə də xüsusi diqqət yetirilir. Cənubi Qafqazda sülhə və təhlükəsizliyə ciddi təhdid mənbəyi olan Ermənistanın dövlət orqanları və erməni diasporu tərəfindən Azərbaycan ərazisində təxribat-pozuculuq aksiyalarının keçirilməsi cəhdlərinin qarşısının alınması üçün müvafiq tədbirlər görülmüşdür. Ermənistanla informasiya mübarizəsində nazirliyin son vaxtlar əldə etdiyi nailiyyətlər xüsusi əhəmiyyət daşıyır.

Hörmətli mərasim iştirakçıları!

Bütün bu nailiyyətlər və nəticələr, hələ ictimaiyyətə məlumat verilməmiş digər uğurlu tədbirlər bizi qətiyyən arxayın etmir, əksinə, milli təhlükəsizlik naminə səylərimizi daha da artırmağa məsul edir.

Biz bu gün Ali baş komandanın qarşımızda qoyduğu tələbləri başa düşürük və onu öz fəaliyyətimizdə rəhbər tuturuq. Bizim qarşımızda duran ən ümdə vəzifə gəncləri dövlətçilik və vətənpərvərlik, Heydər Əliyev amallarına sədaqət ruhunda tərbiyə etməkdir. Hazırda kadrların seçilib yerləşdirilməsi və təlim-tərbiyəsində bu prinsiplər rəhbər tutulur, eyni zamanda, gənclərimizin fiziki və peşə hazırlığına, müasir bilik səviyyəsinin və dünyagörüşünün formalaşmasına böyük önəm verilir.

Hörmətli qonaqlar!

Cənab zabitlər və kursantlar!

Milli Təhlükəsizlik Nazirliyinin Heydər Əliyev adına Akademiyasında ümummilli liderimizin abidəsinin, “Şöhrət” muzeyinin açılışı və Akademiyaya Döyüş bayrağının verilməsi münasibətilə sizin hamınızı bir daha təbrik edirəm. Əminəm ki, əməkdaşlarımız xalqımızın inamı, möhtərəm Prezidentimizin göstərdiyi yüksək qayğı müqabilində bütün qüvvə və imkanlarını milli maraqlarımızın və təhlükəsizliyimizin layiqincə təmin edilməsinə yönəldəcəklər!

Möhtərəm cənab Prezident!

Peşə bayramı ərəfəsində imzaladığınız Sərəncamla nazirliyimizin bir qrup əməkdaşının mükafatlandırılması bütün şəxsi heyət tərəfindən böyük iftixar hissi ilə qarşılanmışdır. İcazə verin, bu yüksək etimad və qayğıya görə bütün şəxsi heyət adından Sizə bir daha minnətdarlığımı bildirim. Sizə məruzə etmək istərdim ki, ölkənin hərtərəfli təhlükəsizliyi, Heydər Əliyev ideyalarının həyata keçirilməsi naminə milli maraqların qorunması, ərazi bütövlüyümüzün bərpası yolunda təhlükəsizlik orqanlarının əməkdaşları üzərlərinə düşən vəzifəni dərindən dərk edir, onu böyük peşəkarlıq və fədakarlıqla yerinə yetirməyə qadirdirlər.

Möhtərəm Prezident, əmin ola bilərsiniz ki, biz daim milli maraqlarımızın, dövlətçiliyimizin və müstəqilliyimizin təhlükəsizliyi keşiyində ayıq-sayıq dayanırıq.

Cənab Ali baş komandan!

Bütün əmr və göstərişlərinizi hər an, dönmədən və fədakarlıqla yerinə yetirməyə hazırıq!

Diqqətinizə görə sağ olun.

X X X

Azərbaycan Prezidenti, Ali baş komandan İlham Əliyev mərasimdə nitq söylədi.