Mixail Qusman: Bu gün AZƏRTAC Azərbaycanın mövqeyini, ölkəmizin səsini beynəlxalq ictimaiyyətə çatdırır VİDEO
Bakı, 26 may, AZƏRTAC
Doğma universitetimə səmimi minnətdarlığımı bildirirəm. Mən məhz burada təhsil almışam, həyatını bütünlüklə Xarici Dillər Universitetinə həsr etmiş anam da uzun illər burada çalışıb. Xarici Dillər Universitetinin fəxri professoru adına layiq görülmək mənim üçün böyük şərəfdir.
Bu sözləri AZƏRTAC-ın müxbiri ilə söhbətində tanınmış jurnalist, bakılı Mixail Qusman deyib.
O bildirib ki, Azərbaycan Dillər Universiteti onun həyatında xüsusi yer tutur və onun üçün əsl “Alma Mater” olaraq qalır.
“Bu universiteti fərqlənmə diplomu ilə bitirmişəm və bütün həyatım boyu onunla sıx əlaqəmi qoruyub saxlamışam. Hətta Bakıdan kənarda yaşadığım dövrlərdə də həmişə bura gəlməyə, tələbələrlə görüşməyə, seminarlarda iştirak etməyə və mühazirələrlə çıxış etməyə çalışmışam. Bu gün Elmi Şura yekdilliklə mənə fəxri professor adının verilməsi barədə qərar qəbul edəndə mən rektor Kamal Abdullaya və universitetin kollektivinə söz verdim ki, ali məktəbə yalnız formal olaraq deyil, praktik baxımdan da faydalı olmaq üçün əlimdən gələni edəcəyəm”, – deyə Mixail Qusman vurğulayıb.
Azərbaycanın beynəlxalq media məkanındakı rolu və jurnalistikanın inkişafından danışan Mixail Qusman qeyd edib ki, bu gün ölkə dünya arenasında getdikcə daha nəzərəçarpan yer tutur: “Bu, şübhəsiz ki, Azərbaycan Prezidenti İlham Əliyevin ardıcıl və qətiyyətli siyasətinin nəticəsidir. Ölkənin beynəlxalq mövqelərinin möhkəmlənməsi ilə yanaşı, Azərbaycan mediasının qlobal informasiya məkanındakı rolu da artır”.
Jurnalist AZƏRTAC İnformasiya Agentliyinin fəaliyyətini xüsusi vurğulayaraq bildirib ki, agentlik uzun illərdir aparıcı beynəlxalq media birliklərinin işində fəal iştirak edir və Azərbaycanı qlobal informasiya məkanında layiqincə təmsil edir.
“Bu gün AZƏRTAC Azərbaycanın mövqeyini, ölkəmizin səsini beynəlxalq ictimaiyyətə çatdırır. Bu, bütün dünyada hörmət və rəğbətlə qarşılanır”, – deyə Mixail Qusman qeyd edib.
Bölmənin digər xəbərləri
