MOSKVA KİYEVƏ KERÇ BOĞAZINDA SƏRHƏD OLMADIĞINI XATIRLADIR
Ukraynanın Moskvadakı müvəqqəti işlər vəkili yanvarın 20-də RF XİN-ə dəvət edilmiş və ona cavab notası təqdim olunmuşdur. Notada Rusiyanın ünvanına irəli sürülən bu cür ittihamların “anlaşılmaz” olduğu bildirilir.
Rusiya XİN xatırlatmışdır ki, Kerç boğazı akvatoriyasında dövlət sərhədi yoxdur, onun hüquqi statusu Azov dənizindən və Kerç boğazından istifadə sahəsində əməkdaşlıq haqqında müqavilə əsasında aparılan danışıqların mövzusudur.
Notada deyilir: “Kerç boğazının hüquqi statusuna dair danışıqlar aparıldığı bir vaxtda Kiyevin belə hərəkətləri hamılıqla qəbul edilmiş beynəlxalq hüquq normalarına ziddir, qəti saziş bağlanmasını təhlükə qarşısında qoyur. Rusiya tərəfi bu hərəkətləri rədd edir”.
Xatırladaq ki, yanvarın 17-də Ukrayna XİN başçısının müavini Vladimir Oqrızko bildirmişdir ki, onun hökuməti Rusiyadan Kerç boğazı rayonunda “icazəsiz aparılan işlərin” dayandırılmasını tələb etmişdir. Onun sözlərinə görə, bu işlərin aparıldığı “Urenqoy” gəmisi vaxtaşırı Ukraynanın su ərazilərinə daxil olur və bununla da ölkənin suverenliyini və su ərazilərini pozur. O vurğulamışdır ki, belə işlər ancaq Ukrayna tərəfinin razılığı ilə görülə bilər.
Bölmənin digər xəbərləri
