MOSKVADA İNFORMASİYA AGENTLİKLƏRİNİN ÜMUMDÜNYA KONQRESİ KEÇİRİLİR
Konqresin işində 99 ölkənin 115 aparıcı informasiya agentliyinin, o cümlədən də AZƏRTAC-ın Baş direktoru Aslan Aslanov başqa olmaqla Azərbaycan Dövlət Teleqraf Agentliyinin nümayəndələri iştirak edirlər.
Dünyanın aparıcı informasiya agentlikləri rəhbərlərinin görüşü çərçivəsində sentyabrın 23-də MDB ölkələri xəbər agentliklərinin İnformasiya şurasının iclası keçirilmişdir. İclasda Birlik dövlətlərinin Milli İnformasiya Agentlikləri Assosiasiyasının (MİAA) yaradılması haqqında qərar, habelə MDB-nin informasiya agentlikləri arasında xəbərlər mübadiləsinin qaydası və MİAA xidmətinin yaradılması haqqında qərar qəbul edilmişdir.
İTAR-TASS agentliyinin xəbərlər xidmətinin baş redaktoru Sergey Karmalito AZƏRTAC-ın müxbiri ilə söhbətində demişdir ki, Milli İnformasiya Agentlikləri Assosiasiyasının yaradılması haqqında qərar MDB-nin informasiya agentlikləri arasında xəbərlər mübadiləsinə daha fəal başlamaq üçün geniş imkanlar açır. Onun sözlərinə görə, bu ilin sonunadək ümumi informasiya lenti yaratmaq planlaşdırılır. Burada Birliyin hər bir informasiya agentliyi ümumi İnternet səhifəsində hər gün özünün lazım bildiyi, təxminən 10 xəbər yerləşdirə bilər. Bu, bütün MDB dövlətləri üçün qarşılıqlı surətdə faydalı informasiya məhsulu yaratmağa imkan verəcəkdir.
Bölmənin digər xəbərləri
