Müasir Azərbaycan enerji təhlükəsizliyinin açar ölkəsi və humanitar diplomatiyanın fəal iştirakçısıdır-ŞƏRH
Bakı, 29 may, AZƏRTAC
28 May – Müstəqillik Günü Azərbaycan xalqının əsrlər boyu davam edən azadlıq və suverenlik arzusunun reallığa çevrildiyi, öz müqəddəratını təyin etmək hüququnu beynəlxalq hüquq çərçivəsində həyata keçirdiyi fəxr etdiyimiz, vüqarlandığımız gündür. XX əsrin əvvəllərində baş verən mürəkkəb geosiyasi proseslər şəraitində yaradılan Azərbaycan Xalq Cümhuriyyəti (AXC), yalnız Azərbaycan tarixində deyil, bütövlükdə Şərq və İslam dünyasında ilk parlamentli, demokratik və dünyəvi respublika kimi əbədiyyət qazanıb.
Bu sözləri Milli Məclisin deputatı, Mədəniyyət komitəsinin sədr müavini Günay Əfəndiyeva AZƏRTAC-a açıqlamasında söyləyib.
AXC-nin milli dövlətçilik ənənələrinin bərpası və müasir dövlətçiliyin əsaslarının qoyulması baxımından fundamental əhəmiyyət daşıdığını vurğulayan Günay Əfəndiyeva deyib: “Azərbaycan Milli Şurasının 1918-ci il 28 may tarixli İstiqlal Bəyannaməsi ilə elan edilən AXC cəmi 23 ay fəaliyyət göstərməsinə baxmayaraq, bu cümhuriyyətin hüquqi, siyasi və ideoloji irsi Azərbaycan Respublikasının dövlət quruluşunda bu gün də yaşamaqdadır. AXC dövründə qəbul edilən qərarlar - qadınlara seçki hüququnun verilməsi, milli ordu və diplomatik korpusun yaradılması, milli valyutanın dövriyyəyə buraxılması və digər mühüm institusional islahatlar o dövrün kontekstində olduqca qabaqcıl və cəsarətli, olduqca mühüm siyasi addımlar idi. Lakin 1920-ci ilin aprelində sovet işğalı ilə Azərbaycan müstəqilliyini itirsə də, bu ideya heç vaxt xalqın yaddaşından silinmədi. Xalqımızın milli iradəsi, müstəqillik arzusu yaşadı və nəhayət 1991-ci ildə Azərbaycan Respublikası öz suverenliyini bərpa etdi. Beləliklə, 28 May tarixinin yenidən dövlət bayramı kimi qeyd olunması yalnız tarixi ədalətin bərpası deyil, həm də milli yaddaşın, milli qürurun dirçəlməsi idi”.
Deputat tarixi irsi müasir dövrdə daha da möhkəmləndirən Ulu Öndər Heydər Əliyevin apardığı milli dövlət quruculuğu siyasəti barədə danışıb: “Ümummilli Lider Heydər Əliyev Azərbaycanın müstəqilliyini yalnız de-jure deyil, həm də de-fakto səviyyəsinə qaldırmış, müasir hüquqi dövlətin və vətəndaş cəmiyyətinin təməl sütunlarını formalaşdırmışdır. Onun siyasi kursunu davam etdirən Prezident İlham Əliyevin rəhbərliyi altında isə Azərbaycan öz tarixinin ən qüdrətli dövrünü yaşayır. Bu gün Azərbaycan Respublikası regionda və onun hüdudlarından kənarda sülh, inkişaf və əməkdaşlıq modelini təklif edən, enerji təhlükəsizliyində həlledici rol oynayan, mühüm beynəlxalq layihələrin təşəbbüskarı və icraçısı olan nüfuzlu bir dövlətdir. Azərbaycanın ərazi bütövlüyünün və suverenliyinin tam şəkildə bərpası məhz həmin dövlətçilik iradəsinin və müstəqillik əzminin təcəssümünə çevrildi. Bu tarixi hadisələr, müasir Azərbaycanın real gücünü, milli birliyini və siyasi qətiyyətini nümayiş etdirdi.
Müasir Azərbaycan – Cənubi Qafqazın lider dövləti, Avropa ilə Asiyanı birləşdirən nəqliyyat dəhlizlərinin mərkəzi, enerji təhlükəsizliyinin açar ölkəsi və humanitar diplomatiyanın fəal iştirakçısıdır. Bu nailiyyətlərin hər biri Azərbaycanın milli müstəqillik irsinə sadiqliyinin təzahürüdür. XX əsrin əvvəllərində Azərbaycan bütün müsəlman Şərqində, o cümlədən Türk dünyasında ilk müstəqil demokratik respublika idi. XXI əsrin əvvəlində isə Ulu Öndərin qoyduğu təməllərə əsaslanan Azərbaycan dünya miqyasında mühüm strateji əhəmiyyət kəsb edən, qlobal təsirə malik müasir və qüdrətli ölkədir”.
Bölmənin digər xəbərləri
