Müasir Azərbaycanın inkişafında vətəndaş cəmiyyətinin rolu
Bakı, 1 noyabr, AZƏRTAC
Azərbaycan Tibb Universitetində (ATU) Milli Qeyri-Hökumət Təşkilatları Forumunun (MQF) Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirdiyi “QHT-lərə institusional inkişaf sahəsində xidmətlərin göstərilməsi” layihəsi çərçivəsində “Müasir Azərbaycanın inkişafında vətəndaş cəmiyyətinin rolu” mövzusuna həsr olunmuş tədbir keçirilib.
MQF-dən AZƏRTAC-a bildirilib ki, tədbirdə ATU-nun baş müəllimi, İctimai Nəzarət və Məsləhət Şurasının sədr müavini Aida Bəndəliyeva MQF-nin layihəsinin əhəmiyyətindən danışıb.
Milli Qeyri-Hökumət Təşkilatları Forumunun prezidenti Rauf Zeyni tədbirin keçirilməsində göstərilən dəstəyə görə ATU-nun rəhbərliyinə və kollektivinə dərin minnətdarlığını bildirib. Vətəndaş cəmiyyətinin tarixi və əhəmiyyətindən danışan Rauf Zeyni bildirib ki, ulu öndər Heydər Əliyevin təşəbbüsü ilə 1997-ci ildə BMT ilə Azərbaycan hökuməti arasında əməkdaşlıq memorandumu imzalanıb və bu, vətəndaş cəmiyyətinin inkişafına böyük təkan verib. Prezident İlham Əliyev tərəfindən uğurla davam etdirilən bu siyasət Azərbaycanın hərtərəfli inkişafını təmin edib. Milli Qeyri-Hökumət Təşkilatları hərəkatının genişlənməsi, onların fəaliyyətinin qabaqcıl beynəlxalq təcrübəyə və mövcud qanunvericiliyə uyğun qurulması, əlaqələndirilməsi, QHT-lərin dövlət orqanları, media və özəl sektorla qarşılıqlı faydalı əməkdaşlığının təmin olunması vətəndaş cəmiyyətinin inkişafı və onların qarşılaşdığı problemlərin həllinə yardım etmək məqsədilə yaradılmış, cəmiyyətin tərəqqisinə yönələn müxtəlif proqram və layihələrin reallaşmasında, əhalinin maarifləndirilməsində, ümummilli məsələlərlə bağlı ictimai fikrin formalaşmasında əhəmiyyətli rol oynayır.
Azərbaycan mədəniyyətinin dünyada təbliği, Xocalı soyqırımına ədalətli qiymətin verilməsi və ölkəmizin məruz qaldığı təcavüz aktının ifşa edilməsi istiqamətində Heydər Əliyev Fondunun və Azərbaycan Respublikasının Birinci vitse-prezidenti Mehriban Əliyevanın təşəbbüsü ilə həyata keçirilən layihələr hər zaman QHT sektoru və Şura üçün nümunə olub. Bu baxımdan qeyd olunan istiqamətlər üzrə dövlətimizin həyata keçirdiyi siyasətə ictimai dəstək vermək məqsədilə müxtəlif tədbirlər həyata keçirilir. Biz bir vətəndaş və vətəndaş cəmiyyəti olaraq bu cür maarifçilik hərəkatlarını davam etdirməli, cəmiyyətimizin inkişafı naminə səfərbər olmalıyıq.
Daha sonra “İki sahil” qəzetinin baş redaktoru, ATU İctimai Nəzarət və Məsləhət Şurasının üzvü, Mətbuat Şurasının idarə heyətinin üzvü Vüqar Rəhimzadə çıxış edərək son illər ölkəmizin bütün sahələrdə dinamik inkişafından, Azərbaycan Prezidentinin rəhbərliyi ilə bütün sahələrdə uğurlu islahatlarının aparılmasından, milli mətbuatın inkişafına dövlət dəstəyindən, vətəndaş cəmiyyətinin inkişafından və digər məsələlərdən danışıb.
“Cəmiyyətin və vətəndaş münasibətlərinin inkişafı” İctimai Birliyinin sədri, ATU İctimai Nəzarət və Məsləhət Şurasının üzvü Əhməd Abbasbəyli ölkədə vətəndaş cəmiyyətinin mövcud vəziyyəti, aparılan islahatlar və onların nəticələri, ictimai nəzarət və şəffaflığın əhəmiyyəti, korrupsiya və rüşvətxorluğa qarşı mübarizə, QHT-hökumət münasibəti, ictimai şuraların fəaliyyəti və digər məsələlər barədə danışıb.
Sonda tədbir iştirakçılarının sualları cavablandırılıb.
Bölmənin digər xəbərləri
