MUSİQİLİ KOMEDİYA TEATRI YENİ MÖVSÜMÜ AÇMIŞDIR
AZƏRTAC-ın müxbiri xəbər verir ki, teatr öz yeni mövsümünü dramaturq Tamara Vəliyeva və bəstəkar Emin Sabitoğlunun “Bankir adaxlı” tamaşası ilə açmışdır. Rejissor Faiq Zöhrabovun tamaşaya qoyduğu komediyada baş rollarda xalq artistləri Hacıbaba Bağırov, Afaq Bəşirqızı, Fatma Mahmudova, əməkdar artistlər Xanım Qafarova, Gülnar Salmanova, aktyorlar Novruz Qartal, Nahidə Orucova və başqaları çıxış etmişlər.
Teatrın direktoru və bədii rəhbəri, respublikanın xalq artisti Hacıbaba Bağırov yeni mövsümün açılışı ilə əlaqədar demişdir ki, bu mövsümü Üzeyir Hacıbəyovun doğum günündə açırıq. İndi Rəşad Nuri Güntəkinin “Belə olmaz arkadaş”( “Bir günlük siğə”) komediyasını hazırlayırıq. Bu komediyanın musiqisi Sərdar Fərəcovundur. Rejissor Yusif Əkbərovun hazırladığı tamaşa oktyabrın axırında göstəriləcəkdir. Bu mövsümdə yazıçı Anarın və bəstəkar Vasif Adıgözəlovun “Gördün dayıvı, aldın payıvı” komediyası da tamaşaçılara təqdim olunacaqdır. Teatrın portfelində, həmçinin yazıçı Aqşin Babayevin və musiqisi Oqtay Rəcəbovun “Şeytanın toyu” əsəri vardır.
Teatrın rus bölməsi isə Kalmanın “Bayadera” operettası üzərində çalışır. Yeni mövsümdə uşaq tamaşaları və bir şou proqramı hazırlanacaqdır. Respublikanın rayonlarında da tamaşalar göstəriləcəkdir.
Bölmənin digər xəbərləri
