Müstəqilliyin 25 ili: Yevlax gözəlliyi ilə seçilən bir şəhərə çevrilib FOTOREPORTAJ
Yevlax, 4 yanvar, Tahir Ağaməmmədov, AZƏRTAC
Azərbaycanın dövlət müstəqilliyinin qazanılmasından ötən 25 il ərzində bölgələrdə davamlı sosial-iqtisadi tərəqqiyə nail olunub. Əsası ulu öndər Heydər Əliyev tərəfindən qoyulan inkişaf strategiyasının uğurla icra edilməsi nəticəsində digər bölgələrdə olduğu kimi, Yevlax rayonunun da iqtisadiyyatı dinamik inkişaf edib.
Yevlax şəhərində və rayonun kəndlərində genişmiqyaslı yenidənqurma və tikinti-quruculuq işləri görülüb, infrastruktur layihələri həyata keçirilib, kənd təsərrüfatı, qida və sənaye məhsulları istehsalına yönəldilən investisiyalar çoxalıb, yeni sənaye obyektləri yaradılıb. Bu dövrdə rayonda “Lalə-tekstil” MMC tikiş fabriki, “Dan” kərpic, “Gilan” dəri emalı, “Yevlax Qida” MMC zavodları, “Arfa” mebel fabriki, “Yevlax-Beton” ASC dəmir-beton zavodu, asfalt istehsal edən zavodlar, “Azərtoxum” MMC toxum emalı müəssisəsi, çörək sexləri fəaliyyətə başlayıb. Kolanı kəndində istixana kompleksi yaradılıb. Növbəti illərdə keramikadan və gipsdən müxtəlif məmulatlar (tikinti və məişət) istehsalı sahələrinin, məişət tullantıları və çörək zavodlarının yaradılması nəzərdə tutulur.
Aparılan genişmiqyaslı tikinti-quruculuq işləri nəticəsində Yevlax şəhərinin siması tamamilə dəyişib. Artıq Yevlax gözəlliyi ilə seçilən bir şəhərə çevrilib. Yevlax şəhərinin prospekt və küçələri müasir üslubda yenidən qurulub, yollara asfalt çəkilib, işıqlandırma sistemləri quraşdırılıb, binaların dam örtüyü dəyişdirilib, fasad hissəsi müasirləşdirilib. Şəhərin mərkəzində dahi rəhbərin abidəsi ucaldılıb. Bundan başqa, Ulu Öndərin adını daşıyan mərkəz və saray, gənclər evi, elektron kitabxana, tarix-diyarşünaslıq muzeyi, xalq teatrı, şahmat məktəbi, məhdud fiziki imkanlı insanlar üçün regional informasiya mərkəzi, stadion, bayraq meydanı, avtovağzal kompleksi, Qarabağ müharibəsi əlilləri və şəhid ailələri üçün 116 mənzilli 5 çoxmərtəbəli yaşayış binası, 31 idarə, müəssisə və təşkilat üçün inzibati binalar tikilib istifadəyə verilib. Hava limanı və Səmədabad-Qaraməmmədli-Qaramanlı-Köyük avtomobil yolu yenidən qurulub, “EL-TV” regional televiziya şirkəti fəaliyyətə başlayıb. Yevlax şəhəri də daxil olmaqla, 43 yaşayış məntəqəsi (ümumi əhali abonentlərinin 95 faizi) qazlaşdırılıb.
Ölkənin bütün bölgələrində olduğu kimi, Yevlax rayonunda da məktəblərin maddi-texniki bazasının möhkəmləndirilir, yeni məktəb binaları tikilir. Belə ki, 2003-cü ildən indiyədək rayonda 5638 şagird yerlik 24 məktəb binası inşa edilib, 11 məktəb binasında əsaslı təmir işləri aparılıb, 3 məktəbdə 640 şagird yerlik 32 sinif otağı tikilib.
Müstəqillik illərində Yevlaxda əhaliyə tibb xidmətinin səviyyəsinin yüksəldilməsi, səhiyyə infrastrukturunun yaradılması, tibb ocaqlarının tikintisi və yenidən qurulması, müasir avadanlıqla təchizatı istiqamətində də xeyli iş görülüb. Bu dövrdə 180 çarpayılıq rayon mərkəzi xəstəxanası, uşaq xəstəxanası, regional vərəm dispanseri, əlillərin reabilitasiya mərkəzi, gigiyena və epidemiologiya mərkəzi, kəndlərdə həkim məntəqələri inşa edilərək istifadəyə verilib.
Bir zamanlar şoran torpaqlarında bir ağacın yetişdirilməsi olduqca çətin olan Yevlax indi parklar və xiyabanlar şəhəri kimi tanınır. Əhalinin istirahəti və ekoloji mühitin yaxşılaşdırılması məqsədilə geniş yaşıllaşdırma işləri aparılıb, yeni parklar salınıb, Kür çayı sahilində Bulvar İstirahət Kompleksi yaradılıb.
Yevlax şəhərinə səfərlərinin birində ümummilli lider Heydər Əliyev "Mən Yevlaxı daha abad, daha gözəl görmək istəyirəm" arzusunu ifadə etmişdi. Bu gün yevlaxlılar böyük iftixar hissi ilə deyə bilərlər ki, onlar Ulu Öndərin arzuladığı şəhəri daha da gözəlləşdirə biliblər.
Regionların inkişafını daim diqqət mərkəzində saxlayan Prezident İlham Əliyevin Yevlaxa 7 dəfə səfər etməsi, rayonun sosial-iqtisadi inkişafının sürətləndirilməsi barədə imzaladığı sərəncamlar şəhərin müasir inkişafının şərtləndirən əsas amillərdəndir. Ölkə başçısının Yevlax rayon ictimaiyyəti ilə görüşü zamanı dediyi “Çox şadam ki, Yevlax çox sürətlə inkişaf edir və rayonun gələcək inkişafı ilə bağlı əlavə tədbirlər görüləcəkdir” sözləri yevlaxlıların qurub-yaratmaq həvəsini daha da artırıb.
Bölmənin digər xəbərləri
