Müvəqqəti saxlama yerində saxlanılan şəxsə gətirilən sovqatın içindən narkotik maddə aşkarlanmışdır
Bakı, 31 oktyabr (AZƏRTAC). Şirvan şəhər sakini Fərid Rəhimovun şəhər polis şöbəsinin müvəqqəti saxlama yerində saxlanılan şəxsə gətirdiyi sovqatın içindən 0,895 qram tiryək aşkar olunaraq götürülmüşdür.
F.Rəhimova narkotik vasitəni vermiş şəhər sakini, əvvəllər məhkum olunmuş Əvəz Əliyev Şirvan Şəhər Polis Şöbəsinin əməkdaşları tərəfindən tutulmuşdur.
Oktyabrın 28-də naməlum şəxs Yasamal rayonunun ərazisindəki apteklərdən birində ödəniş etmədən uşaq dəsti götürüb gedərkən həmin aptekin satıcısı Nail Mənsimov onun qarşısını kəsmişdir. Həmin şəxs özünə ülgüclə xəsarət yetirəcəyini bildirib hadisə yerindən qaçmışdır.
Oktyabrın 29-da isə paytaxtın B.Vahabzadə küçəsində Bakı şəhər sakini Nadir Hüseynovun satıcı işlədiyi kompyuter mağazasından da naməlum şəxs eyni üsulla kompyuter aksesuarları aparmışdır.
Hadisəni törətmiş Yevlax rayon sakini Bəxtiyar Xasanov Yasamal Rayon Polis İdarəsinin 28-ci bölməsi əməkdaşlarının keçirdikləri əməliyyat-axtarış tədbirləri nəticəsində tutulmuşdur. Ondan 0,484 qram heroin götürülmüşdür.
Daxili İşlər Nazirliyinin mətbuat xidmətindən AZƏRTAC-a bildirmişlər ki, hər iki faktla bağlı cinayət işi açılmışdır, araşdırmalar davam etdirilir.
Bölmənin digər xəbərləri
