NARKOMANLIQ VƏ QİÇS-İN PROFİLAKTİKASI İLƏ BAĞLI REKLAM ROLİKLƏRİ MÜSABİQƏSİNİN QALİBLƏRİ MÜKAFATLANDIRILMIŞLAR
AZƏRTAC xəbər verir ki, gənclər arasında hüquq pozuntuları, narkomanlıq, QİÇS və digər neqativ halların profilaktikası ilə bağlı reklam rolikləri müsabiqəsinin qalibləri iyulun 5-də mükafatlandırılmışlar.
Gənclər və İdman Nazirliyinin və UNİCEF-in Azərbaycandakı nümayəndəliyinin birgə həyata keçirdikləri bu layihədə iştirak etmək üçün 6 nəfər gənc öz reklam roliklərini təqdim etmişdir.
Gənclər və idman nazirinin müavini İntiqam Babayev müsabiqəni keçirməkdə əsas məqsədin gənclərin narkomanlığa aludəçiliyinin qarşısını almaq, onlarda sağlam həyat tərzinin formalaşmasına kömək etməkdən ibarət olduğunu söyləmişdir.
Qalibləri müəyyən etmək üçün əlaqədar dövlət orqanları və beynəlxalq təşkilatların nümayəndələrindən ibarət yaradılmış münsiflər heyəti mükafatçıları müəyyən etmişdir. Birinci yeri Şamil Abbasov tutmuşdur. Sənan Vəliyev ikinci, Anar Məliklinin çəkdiyi videorolik isə üçüncü mükafata layiq görülmüşdür.
Müsabiqənin qalibləri müvafiq yerlər üzrə 2500, 1500 və 1000 manat pul mükafatı və diplomla mükafatlandırılmışlar.
Bölmənin digər xəbərləri
