NASA astronavtları qırılan meşəni şahmat taxtasına bənzədiblər
Bakı, 6 fevral, AZƏRTAC
ABŞ-ın Milli Aeronavtika və Kosmik Fəzanın Tədqiqi Agentliyi (NASA) astronavtlardan birinin Beynəlxalq Kosmik Stansiyadan (BKS) çəkdiyi qeyri-adi şəkli dərc edib. “Live Science” elmi portalının təqdim etdiyi fotoda ABŞ-ın Aydaho ştatı ərazisindəki meşə massivi əks olunub. Burada uzun illərdir ağaclar kvadratlar üzrə kəsilir. AZƏRTAC “svopi.ru” saytına istinadla xəbər verir ki, nəticədə nəhəng şahmat taxtası əmələ gəlib.
Fotoda ağ sahələr ağacların qırıldığı əraziyə düşən qar örtüyünə görə aydın görünür, tünd fraqmentlər isə meşə əkinlərini əks etdirir. Bu diqqətəlayiq mənzərə NASA mütəxəssislərini o dərəcədə heyrətləndirib ki, onlar öz müşahidələrini cəmiyyətlə bölüşmək qərarına gəliblər.
Ağacların şahmat xanaları şəklində kəsilməsi qaydası XIX əsrin əvvəlindən qüvvədədir. Onda ABŞ hökuməti meşə massivlərini qoruyub saxlamaqla yanaşı, ağac emalı sənayesinin inkişafını təmin etmək üçün yerli torpaqların bir kvadratmillik sahələrə bölünməsi haqqında qərar qəbul etmişdi.
Sonralar həmin sahələr azaldılaraq 0,4 kvadratmilə çatdırılıb. Əvvəllər oduncaq axıdılması üçün istifadə olunan Prist çayının yaxınlıqda yerləşməsi də ağac tədarükçülərinin seçimində az rol oynamayıb. 1968-ci ildə hökumət Prist çayından taxta-şalban daşınması üçün istifadə olunmasına qadağa qoyub. Amma şəkildən də göründüyü kimi, həmin ərazidə meşəqırma hələ də çiçəklənir.
Bölmənin digər xəbərləri
