NATO-nun QAPILARI YENİ ÜZVLƏRİN ÜZÜNƏ AÇIQDIR
ABŞ dövlət katibinin siyasi məsələlər üzrə müavini Mark Qrossman martın 27-də Senatın Silahlı Xidmətlər Komitəsində çıxış edərək NATO-nun gələcək fəaliyyəti haqqında danışmışdır.
AZƏRTAC-ın xüsusi müxbiri Vaşinqtondan verdiyi xəbərə görə, M.Qrossman alyansın ABŞ-ın təhlükəsizliyi üçün vacibliyini vurğulayaraq deyib ki, NATO-nun qapıları yeni üzvlərin üzünə açıq qalmalıdır. Baltik dənizdən Qara dənizədək Avropanın bütün yeni demokratiyaları qədim demokratiyalarla yanaşı eyni təhlükəsizlik, azadlıq və Avropanın institutlarına qoşulmaq imkanı əldə etməlidir. Natiq demişdir: “NATO Avropa, Qafqaz və Mərkəzi Asiyada geniş tərəfdaş şəbəkəsi formalaşdırmaq işini davam etdirəcəkdir. On il bundan əvvəl “Sülh naminə tərəfdaşlıq proqramı”nı yaradarkən, heç ağlımıza belə gətirməzdik ki, bir gün alyansın düşmənlərini dəf etməkdə yardım üçün Mərkəzi Asiyadakı tərəfdaşlarımıza güvənəcəyik”.
Dövlət katibinin müavini NATO-nun İraq müharibəsində rolu haqqında da danışıb. Onun sözlərinə görə, NATO Türkiyənin müdafiəsi ilə yanaşı, postmünaqişə dövründə sülhməramlı proseslərdə və sabitliyin qorunmasında iştirak edə bilər. Lakin bu məsələ ətrafında müzakirələr hələ davam edir.
Şəfəq Akifqızı
AZƏRTAC-ın xüsusi müxbiri
Vaşinqton
Bölmənin digər xəbərləri
