Naxçıvan Muxtar Respublikasının Bakıdakı daimi nümayəndəliyində 20 Yanvar faciəsi qurbanlarının xatirəsi anılıb
Bakı, 19 yanvar, AZƏRTAC
Yanvarın 19-da Naxçıvan Muxtar Respublikasının Bakı şəhərindəki daimi nümayəndəliyində 20 Yanvar faciəsinin 27-ci ildönümünə həsr olunmuş anım tədbiri keçirilib. Bu barədə AZƏRTAC-a daimi nümayəndəlikdən məlumat verilib.
20 Yanvar şəhidlərinin ruhu bir dəqiqəlik sükutla yad edildikdən sonra çıxış edən daimi nümayəndəliyin rəhbəri Bəxtiyar Əsgərov Azərbaycan xalqının tarixinə Qanlı Yanvar faciəsi kimi daxil olmuş 1990-cı ilin 20 Yanvar hadisələrini həmin gün Azərbaycan xalqına qarşı sovet imperiyası rəhbərliyinin həyata keçirdiyi hərbi təcavüz, insanlığa qarşı törədilmiş ən ağır cinayətlərdən biri kimi xarakterizə edib. Bildirib ki, o qanlı gündən 27 il keçməsinə baxmayaraq, şəhid olanlar yaddaşlarda silinməz iz buraxıblar. Onların mübarizliyi bugünkü gəncliyimizə nümunə məktəbidir. Xalqımız üçün o illərin qaranlıq məqamları zaman keçdikcə aydınlaşıb, yüz illərdi ki, erməni hiyləgərliyi, xəyanəti nəticəsində xalqımıza qarşı törədilmiş amansızlıqlar gün üzünə çıxıb. Qeyd olunub ki, 20 Yanvar faciəsi son dövr tariximizin qanlı hadisələrindən biri kimi, həm də xalqın qan yaddaşında bir mübarizə, qürur günüdür.
Bəxtiyar Əsgərov 20 Yanvar faciəsinin dünyaya çatdırılmasında o zaman Moskvada yaşayan ümummilli liderimiz Heydər Əliyevin əvəzsiz rolundan danışaraq bildirib ki, Heydər Əliyev böyük cəsarət nümayiş etdirərək Moskvada, Azərbaycan nümayəndəliyində sovet rejiminin qanlı cinayətlərinin, 20 Yanvar faciəsinin əsl səbəbkarlarının kim olduğunu bütün dünyaya bəyan edib. Qeyd olunub ki, Ulu Öndər Naxçıvanda işlədiyi zamanda da 20 Yanvar tarixinin hər il ümumxalq hüzn günü kimi qeyd olunmasının və ona siyasi-hüquqi qiymət verilməsinin əsas təşəbbüskarı olub və onun respublikamıza rəhbərliyi dönəmində bu məsələ özünün müsbət həllini tapıb. Ümummilli Liderin layiqli davamçısı Prezident İlham Əliyev də daim tarixilik və müasirlik amilini əsas tutaraq milli-mənəvi dəyərlərimizin, qan yaddaşımızın qorunub saxlanılmasına xüsusi diqqət yetirir. Bu gün müstəqil Azərbaycan dövlətinin bütövlükdə tariximizə, mədəniyyətimizə, adət-ənənələrimizə həssas münasibəti, milli mədəniyyətimizin və tariximizin bütün dünyada dövlət səviyyəsində təbliğ olunması üçün həyata keçirilən fəaliyyətində olduğu kimi, respublikamızda da kədərli, faciəli tariximizin anılması ilə bağlı müvafiq tədbirlər həyata keçirilməkdədir. Naxçıvan Muxtar Respublikasında şəhid ailələrinin, əlillərin problemlərinin dövlət səviyyəsində həllinin mühüm vəzifələrdən biri kimi qarşıya qoyulması bir daha müdrik Prezidentimiz tərəfindən həyata keçirilən siyasətin nə qədər düşünülmüş, insanpərvərlik, vətənsevərlik prinsiplərinə paralel həyata keçirildiyindən xəbər verir. Bu gün hər kəs yaxşı bilir ki, şəhid ailələrinin, əlillərin sosial təminatı ildən-ilə daha da möhkəmləndirilir, onlara yüksək qayğı göstərilir.
Nümayəndəliyin rəhbəri bildirib ki, 20 yanvar günü hər il Naxçıvan Muxtar Respublikasında ümumxalq hüzn kimi izdihamla insanların rayon və şəhərlərdə ucaldılmış və ziyarətgaha çevrilmiş 20 yanvar abidələrinin önündə toplanması ilə qeyd edilir. “Bu barədə danışarkən, Muxtar Respublika Ali Məclisinin Sədri Vasif Talıbovun bu sahədə gördüyü müqayisəsiz işləri, imzaladığı sərəncamları xüsusi qeyd etmək lazımdır. Məhz Ali Məclisin Sədrinin həyata keçirdiyi uğurlu fəaliyyətin nəticəsində Naxçıvan Muxtar Respublikasında Vətənə, torpağa, xalqa bağlılığı tərənnüm edən abidələrin ucaldılması və bu sahədə həyata keçirilən fəaliyyət proqramları gənc nəsillərdə gələcəyə ümid və etibar hissinin möhkəmlənməsinə və xalqımızda böyük gələcəyə inam düşüncəsini aşılamaqdadır.”
Bölmənin digər xəbərləri
