Naxçıvanın Ali Məclisində aparılmış auditin nəticələri açıqlanıb
Bakı, 5 iyul, AZƏRTAC
Hesablama Palatasının 2024-cü il üzrə İş planına uyğun olaraq, Naxçıvan Muxtar Respublikası Ali Məclisi tərəfindən dövlət vəsaitinin və əmlakının istifadəsinin hüquqi aktlara uyğunluğuna dair audit aparılıb.
Palatadan AZƏRTAC-a bildirilib ki, audit 2023-cü ili əhatə edib. 2023-cü il üçün Ali Məclis üzrə 6,3 milyon manat proqnozlaşdırılıb və 4,3 milyon manat xərc icra edilib.
Audit zamanı əsasən aşağıdakılar müəyyənləşdirilib:
-Ali Məclisin saxlanılması üçün ayrılmış vəsaitlərdən smetası rəsmiləşdirilməyən tədbirlərə, funksional fəaliyyətlə birbaşa əlaqəsi olmayan və xərclər smetasında nəzərdə tutulmayan istiqamətlərə 78,9 min manat artıq vəsait xərc olunub;
-Ali Məclisin əməkdaşlarına artıq və qanunvericiliyin tələblərinə uyğun olmayan 79,2 min manat əməkhaqqı, əlavə və mükafatlar ödənilib və buna uyğun sığorta haqqı xərcləri hesablanıb;
-Naxçıvan Muxtar Respublikası Konstitusiyasının 19-cu maddəsinin 4-cü bəndinin tələbləri gözlənilmədən ödənişli fəaliyyətlə məşğul olduqları halda 35 deputatın statusu saxlanılıb və həmin şəxslərə 2023-cü ildə hesablanmış əməkhaqqı xərcləri 312,2 min manat təşkil edib;
-2023-cü ildə Naxçıvan Muxtar Respublikası Ali Məclisinin saxlanılması üzrə vahid büdcə təsnifatının tələbinə əməl edilməyərək, ümumilikdə, 32,4 min manat və satınalma keçirilmədən isə 69,3 min manat xərc edilib;
-Ali Məclisin aparatı üzrə satınalma prosedurları həyata keçirilmədən, tələbatı əsaslandırılmayan və müvafiq qaydada rəsmiləşdirilməyən tarixi, mədəniyyəti təcəssüm etdirməyən və xatirə xarakteri daşımayan hədiyyələrin və s. alınmasına 5,2 min manat vəsait birbaşa xərc edilib.
Audit zamanı müəyyən olunub ki, təşkilatın xəzinə hesabından əlavə Naxçıvanın İnkişafı və Müdafiə Fonduna məxsus 31,5 milyon manat vəsait bank hesabında qalıq olaraq saxlanılıb.
Hesablama Palatasının kollegiyası tərəfindən əsassız xərclənmiş vəsaitlərin büdcəyə bərpası, xərclərin düzgün rəsmiləşdirilməsi və qanunvericiliyin tələblərinə, eləcə də dövlət əmlakının təyinatına uyğun istifadəsi üzərində nəzarətin gücləndirilməsi barədə qərar verilib.
Bölmənin digər xəbərləri
