Bakı, 9 yanvar, AZƏRTAC

Bu gün Avropa İttifaqının (Aİ) Azərbaycana qarşı sərgilədiyi münasibətin rasional məntiqlə izahını vermək mümkün deyil. Əgər söhbət 44 günlük müharibədən, antiterror tədbirlərindən sonra yaranan durumdan, işğalçı ölkənin rüsvayçı məğlubiyyətindən, separatizmin məhvindən doğan reallıqlardan gedirsə, bu, Azərbaycanın, Aİ ölkələrinin əksini açıq şəkildə dilə gətirə bilmədikləri suveren hüquqları çərçivəsində baş verən bir prosesdir. Bu illər ərzində Azərbaycanın bütün maneələrə, öz öhdəliklərinə münasibətdə qlobal məsuliyyət nümunəsi yarada biləcək davranışlarına baxmayaraq, Avropa İttifaqının, bütövlükdə isə Qərb təsisatlarının ölkəmizin ictimai-siyasi mühitinə müdaxilə cəhdləri, müxtəlif layihələr və proqramlar çərçivəsində gənclərimizin beyinlərini “yumaqla” onları öz maraqlarının ifadəçisinə çevirmək niyyətlərini müşahidə etmiş olduq. NED (Аmerikanın “National Endowment for Democracy”) və EED (“Europеan Endowment for Democracy”) tərəfindən maliyyələşdirilən sözdə qrant proqramları, əslində, beyinlərin yuyulmasına xidmət edirdi. Qeyd edim ki, NED-in gerçək mahiyyətini ortaya çıxarmaq üçün qurumun rəhbəri, Corc Sorosun müttəfiqi Vaynşteynin məşhur deyimini xatırlatmaq yerinə düşər. Sitat: “Biz indi Mərkəzi Kəşfiyyat İdarəsinin 25 il öncə gizli şəkildə məşğul olduğu işlərlə aşkarda məşğul oluruq”. Zənnimcə, mahiyyət göz qabağındadır. NED 2016-cı ildən etibarən elan etdiyi qrant layihələrinin “qaliblərini”, 2023-cü ildən başlayaraq isə Azərbaycana yönəlik layihələrinin istiqamətlərini açıqlamır. Amma 2023-cü ilə qədər olan dövr də nəticə çıxarmaq üçün yetərlidir.

Bu fikirləri AZƏRTAC-a açıqlamasında Milli Məclisin deputatı Elçin Mirzəbəyli söyləyib.

Deputat mənzərənin aydın olması üçün NED-in 2022-ci ildə ayırdığı qrantın məbləğinə və ayrılan vəsaitlərin “sərf ediləcəyi” istiqamətlərə nəzər salıb: “Beləliklə, NED 2022-ci il üçün Azərbaycandakı tör-töküntülərinə 970 min 235 ABŞ dolları vəsait ayırıb. Bu məbləğin 398 min 837 dollarının Bakıda və regionlarda vətəndaş iştirakçılığının aktivliyinin artırılması, insan hüquqlarının müdafiəsi adı altında etirazların təşkili, insan hüquqlarının qorunmasının monitorinqi və digər bu kimi məsələlərin maliyyələşdirilməsi ilə bağlı layihələrin gerçəkləşdirilməsinə, yəni, süni qarşıdurma və qarışıqlığın yaradılmasına yönəldilməsi nəzərdə tutulub. NED-in və bu təşkilatı himayə edən siyasi “mərkəz”in xaos texnologiyalarına bələd olanlar, adətən süni qarşıdurma və qarışıqlığın yaradılmasına xidmət edən müxtəlif məzmun və xarakterli aksiyalardan öncə, bəhanələrin yaradıldığını, yaxud səhnələşdirildiyini də yaxşı bilirlər.

NED ənənələrinə uyğun olaraq, bəhanələrin yaradılması üçün də vəsait ayırmağı unutmayıb. Belə ki, Fondun 2022-ci ildə Azərbaycana ayırdığı təsdiqlənmiş qrantlarında may ayı üzrə təcili qrantların maliyyələşdirilməsi ilə bağlı bənd də yer alıb. 2022-ci ilin mart-aprel aylarında NED-in nüfuz müvəkkillərinin canfəşanlığını xatırlasaq, ölkəmizdə ard-arda səhnələşdirilən “hadisələr”in forma və məzmununun bu bəndin icrası istiqamətində fəaliyyətin intensiv bir şəkildə həyata keçirildiyini təsdiqləmiş olduğunu görərik.

NED və bu kimi “institutlar”ın təcrübəsində “təcili qrantların ayrılması”, əksər hallarda bu və ya digər ölkəyə qarşı total kampaniyaların aparılması üçün bəhanələrin yaradılmasına xidmət edir. Mexanizm belədir: Öncə “təcili qrantlar” vasitəsilə hansısa ölkədə “fundamental hüquq və azadlıqların pozulduğunu” nümayiş etdirilən bəhanə və bu bəhanənin ətrafında “5-ci kolon”un təmsilçiləri, eləcə də onların qopardığı hay-küyün təsiri altına düşənlər vasitəsilə ajiotaj yaradılır. Sonra dövlət və hakimiyyət orqanlarının səhnələşdirilmiş bəhanənin “suçlular”ını məsuliyyətə cəlb etmək marağında olmadığı barədə iddialar körüklənməyə başlayır. Bundan sonrakı prosesdə isə, elə NED, Soros Fondu və digər bu kimi “institutlar” tərəfindən maliyyələşdirilən “beynəlxalq insan hüquq və azadlıqlarını müdafiə təşkilatları” işə salınır. Bu “təşkilatlar” da öz növbəsində “hesabatlar” hazırlayaraq, sifarişçinin nişan verdiyi ünvana, misal üçün, ABŞ Dövlət Departamentinə, ABŞ Konqresinə, Avropa Parlamentinə və digər bu kimi təsisatlara “təqdim” edirlər. Sonra da açıqlamalar, bəyanatlar, qətnamələr mərhələsi başlayır”.

NED-in Azərbaycana ayırdığı qrant vəsaitlərinin məbləğinin illər üzrə hadisələrin dinamikasına uyğun olaraq dəyişdiyini vurğulayan deputat bunun maraqlı məqam olduğunu və bəlli bir strategiya üzərindən hərəkət edildiyinin sübuta yetirildiyini söyləyib. O xatırladıb ki, hələ 2017-ci ildə NED-in Azərbaycandakı və yaxud Azərbaycana yönəlik “layihələr”in icrası ilə vəzifələndirilən nüfuz müvəkkilləri üçün ayırdığı vəsaitlərlə bağlı kiçik bir araşdırma aparıb: “Araşdırma zamanı aydın olmuşdu ki, həmin dövrdə Azərbaycana qarşı aparılan kampaniyaların başında dayanan Milli Demokratiya Fondunun 2011, 2012, 2014 və 2016-cı illərdə öz nüfuz müvəkkillərinə əsasən Gürcüstan üzərindən ötürdüyü vəsaitlərin məbləği 4 milyon 595 min 903 ABŞ dolları təşkil edib”.

Elçin Mirzəbəyli diqqətə çatdırıb ki, NED əsasən Azərbaycana qarşı təxribat kampaniyalarının iştirakçısı olan radikal düşərgənin, həmçinin onların QHT və “media” sektorundakı vasitəçilərinin xarici banklarda olan hesablarına 2011-ci ildə 1 milyon 207 min 839, 2012-ci ildə 1 milyon 403 min 867, 2014-cü ildə 913 min 578, 2016-cı ildə 1 milyon 70 min 619 ABŞ dolları vəsait köçürüb.

“Maraqlıdır ki, 2011, 2012 və 2014-cü illərdə bəzi istisnalar olmaq şərtilə NED-in qrant ayırdığı təşkilatların adı açıqlansa da, 2016-cı ildə qrant alan qurumların, yaxud şəxslərin adı gizli saxlanılıb. Doğrudur, NED-in daha öncəki illərdə maliyyələşdirdiyi qrant layihələrində də şəffaflıq prinsipinə əməl olunmayıb. Lakin 2016-cı ildə ayrılan qrantların kimlərə verildiyi barədə demək olar ki, məlumat yoxdur. Yalnız layihələrin adları və ayrılan vəsaitlərin məbləği açıqlanıb. Məsələn, “Mülkiyyət hüquqları”, “İnsan haqlarının monitorinqi”, “Regionlarda insan haqlarının monitorinqi”, “İnformasiya azadlığı”, “Siyasi institutların gücləndirilməsi”, “Azərbaycanlı tərəfdaşların seçki və siyasi proseslərin şəffaflığını və hesabatlılığını təşviq etmək istiqamətində fəaliyyətlərinin dəstəklənməsi” və sair. Mənzərə göz qabağındadır və şübhəsiz ki, Azərbaycan müstəqil hüququn suveren subyekti olduğunu bütün davranışları ilə göz önünə sərgiləyən bir dövlət olaraq, bu qəbildən olan təxribat ssenarilərini görməzdən gələ bilməzdi”, - deyə deputat vurğulayıb.