Nərimanov rayonunda Yeni Azərbaycan Partiyasının yaradılmasının 21-ci ildönümü qeyd edilmişdir
Bakı, 21 noyabr (AZƏRTAC). Noyabrın 21-də Nərimanov rayonunda Yeni Azərbaycan Partiyasının (YAP) yaradılmasının 21-ci ildönümünə həsr olunmuş tədbir keçirilmişdir.
AZƏRTAC xəbər verir ki, tədbiri açan Nəriman Rayon İcra Hakimiyyətinin başçısı Abdin Fərzəliyev partiyanın yaranma tarixindən danışmışdır. O demişdir ki, ölkəmizin ağır vəziyyətlə üzləşdiyi bir dövrdə - 1992-ci il noyabrın 21-də ümummilli lider Heydər Əliyev tərəfindən təsis edilmiş partiya qısa müddətdə mütəşəkkil siyasi qüvvə kimi formalaşmış və yüz minlərlə insanı ətrafında birləşdirmişdir.
A.Fərzəliyev vurğulamışdır ki, bu siyasəti uğurla davam etdirən Prezident İlham Əliyevin ötən 10 ildəki əzmkar fəaliyyəti ölkəmizin onilliklərə bərabər inkişaf yolu keçməsini təmin etmiş, partiyanın cəmiyyətdəki mövqeyini daha da gücləndirmişdir.
A.Fərzəliyev ötən ay keçirilmiş prezident seçkilərində yenidən inamlı qələbə qazanmasını Prezident İlham Əliyevə xalqımızın yüksək etimadının əyani göstəricisi kimi qiymətləndirmişdir.
Yeni Azərbaycan Partiyası Nərimanov rayon təşkilatının sədri Təmraz Tağıyev YAP-ın ümumxalq partiyasına çevrilməsində ümummilli lider Heydər Əliyevin misilsiz xidmətlərindən danışmışdır. O demişdir ki, ölkəmizin müstəqillik tarixində, ictimai-siyasi həyatında aparıcı rol oynayan YAP Azərbaycanın inkişafına böyük töhfələr vermişdir.
YAP İdarə Heyətinin üzvü Kərim Kərimov bildirmişdir ki, 1990-cı ilin əvvəllərində Azərbaycanın taleyini düşünən insanlar ölkəni böhrandan çıxara biləcək yeni bir partiya yaratmaq təşəbbüsü ilə çıxış etmişlər. Ölkənin gələcəyini düşünən ziyalıların müraciətini qəbul edən ümummilli lider Heydər Əliyev Azərbaycanın taleyində çox mühüm rol oynayan Yeni Azərbaycan Partiyasını yaratmışdır. Tarixi zərurətdən yaranan YAP ötən illər ərzində xalqa xidmət missiyasını şərəflə yerinə yetirmişdir.
YAP icra katibinin müavini, Milli Məclisin deputatı Mübariz Qurbanlı qeyd etmişdir ki, 21 il ərzində şərəfli yol keçən partiya biri-birindən əhəmiyyətli uğurlara imza atmaqla cəmiyyətdə nüfuzunu, siyasi çəkisini daha da artırmışdır. O vurğulamışdır ki, ulu öndər Heydər Əliyevin müdrik siyasətinin bu gün Prezident İlham Əliyev tərəfindən uğurla davam etdirilməsi nəticəsində ölkəmizin hərtərəfli inkişafı təmin edilmişdir.
Bu gün partiyanın sıralarında 600 mindən çox üzvün olduğunu vurğulayan YAP icra katibinin müavini, Milli Məclisin deputatı Siyavuş Novruzov onların arasında gənclərin xüsusilə fərqləndiyini demişdir.
Oktyabrda keçirilmiş prezident seçkilərindən danışan S.Novruzov vurğulamışdır ki, Azərbaycan xalqı yenidən İlham Əliyevi Prezident seçməklə ulu öndər Heydər Əliyev siyasətinə sədaqətini və inamını nümayiş etdirmişdir.
Azərbaycan Elmi-Tədqiqat Tibbi Bərpa və Təbii Amillərlə Müalicə İnstitutunun direktoru Əlişir Musayev ümummilli lider Heydər Əliyevin Naxçıvanda və bütövlükdə Azərbaycanda fəaliyyətindən və Ulu Öndərin xalqımız qarşısında böyük xidmətlərindən danışmışdır. O demişdir ki, məhz Ulu Öndərin müdrik siyasəti nəticəsində Azərbaycan bugünkü inkişaf səviyyəsinə çatmışdır.
Tədbirin sonunda YAP-ın 21-ci ildönümü münasibətilə partiyanın və Nərimanov rayonunun ictimai-siyasi həyatında göstərdiyi xidmətlərinə görə fərqlənən şəxslərə fəxri fərmanlar, həmçinin Nərimanov Rayon İcra Hakimiyyəti adından rayonun sosial-iqtisadi və mədəni həyatında fəal iştirakına görə fərqlənənlərə mükafatlar təqdim edilmişdir. Həmçinin partiya sıralarına qəbul olunmuş yeni üzvlərə vəsiqələr təqdim olunmuşdur.
Bölmənin digər xəbərləri
