NİGERİYA OPEK-İN QİYMƏTQOYMA İMKANLARININ GENİŞLƏNDİRİLMƏSİ TƏRƏFDARIDIR
AZƏRTAC-ın xarici informasiya agentliklərindən aldığı xəbərə görə, Nigeriya Prezidentinin energetika məsələləri üzrə baş müşaviri (neft naziri) Edmund Daukoro bildirmişdir ki, Nigeriya neftə qiymətqoyma imkanlarının genişləndirilməsi tərəfdarıdır. Onun sözlərinə görə, “dünya enerji bazarlarında vəziyyət o dərəcədə dəyişmişdir ki, neft müqavilələri imzalanarkən əsas valyuta kimi götürülən ABŞ dolları məzənnəsinin zəifliyi, neftin və yanacaq-sürtkü materiallarının real qiymətinin xeyli artdığı nəzərə alınarsa, bir barreli 22-28 dollar olan neftə indiki qiymətqoyma imkanları, sadəcə olaraq, gülünc görünür”. Afrikanın ən iri neft hasilatçısı olan Nigeriyanın nazri demişdir ki, o, “dünya xammal bazarlarındakı dəyişikliklərə qanuni əsasda reaksiya vermək, neft hasilatı və ixracı kvotalarını dəyişdirmək üçün neftin qiymət həddini artırmağı təklif edən Liviyanın və Birləşmiş Ərəb Əmirliklərinin fikri ilə tam razıdır”. Daukoro demişdir: “Mən hesab edirəm ki, OPEK-in neftə qiymətqoyma imkanı 30 və 40 dollar hüdudlarında müəyyənləşdirilməlidir”. O, eyni zamanda, qeyd etmişdir ki, OPEK-in konfransında neft kvotalarının artırılması təklif olunarsa, Nigeriya bu qərarı dəstəkləməyəcəkdir. Dünyanın xammal bazarları kifayət qədər dolduğundan hasilatı artırmağa lüzum yoxdur”.
