Ödəniş xidmətləri və sistemləri ilə bağlı qanun layihəsi hazırlanır
Bakı, 10 aprel, AZƏRTAC
Azərbaycanda ödəniş xidmətləri və sistemləri ilə bağlı qanun layihəsi hazırlanır.
Azərbaycan Banklar Assosiasiyasından (ABA) AZƏRTAC-a bildiriblər ki, “Ödəniş sistemləri və Alternativ Xidmət Kanalları” üzrə Ekspert Qrupunun iclası keçirilib.
İclasda elektron ticarət qaydasında edilən ödənişlərin 2017-ci il üzrə dövriyyəsinə dair araşdırmanın nəticəsi, Maliyyə Bazarlarına Nəzarət Palatası və Vergilər Nazirliyinə ünvanlanmaq üçün MCC kodların yenilənmiş siyahısı, həmçinin “key-entered” formasında əməliyyatlar müzakirə edilib.
İclas çərçivəsində MOTO tipli əməliyyatlar elektron ticarətə aid edildiyi üçün bu tip əməliyyatlardan vergi tutulmasına davam edilməsi və bununla bağlı banklara rəsmi məktubun ünvanlanması, MCC kodlar üzrə 2017-ci il üçün hazırlanmış hesabatın 2016-cı və 2018-ci illərin müvafiq dövrü ilə müqayisəsi, həmçinin bu ilin birinci rübü üçün MCC siyahısının təsdiqlənərək Vergilər Nazirliyinə, ödəniş xidmətləri və ödəniş sistemləri üzrə qanun layihəsinin rəy və təkliflər üçün banklara göndərilməsi məsələləri qərara alınıb.
Qeyd edək ki, Azərbaycan Banklar Assosiasiyası 1990-cı ildə kommersiya bankları tərəfindən təsis edilib. ABA-nın əsas məqsədi üzv təşkilatların maraqlarını qorumaq, onların müxtəlif növ işgüzar xidmətlərə olan ehtiyaclarının ödənilməsinə yardım göstərmək və fəaliyyətlərini əlaqələndirməkdən ibarətdir. Hazırda 29 bank və 3 qeyri-bank təşkilatı ABA-nın üzvüdür.
Bölmənin digər xəbərləri
