İDMAN
Olimpiya çempionumuz Toğrul Əsgərov “Rio-2016” Olimpiadasına vəsiqə qazanıb VİDEO
Bakı, 11 sentyabr, AZƏRTAC
ABŞ-ın Las-Veqas şəhərində 2016-cı ildə Braziliyanın Rio-de Janeyro şəhərində keçiriləcək XXXI Yay Olimpiya Oyunlarına ilk lisenziyaların qazanıldığı güləş üzrə dünya çempionatı davam edir.
AZƏRTAC xəbər verir ki, dördüncü yarış günündə 55, 58, 63 və 75 kiloqram çəki dərəcəsində qadın, 65 kiloqram çəkidə sərbəst güləşçilər yarışıblar. Azərbaycan güləşçiləri 4 çəki dərəcəsində mübarizə aparıblar. Qadın güləşçilərimizdən Yuliya Ratkeviç (58 kq), sərbəst güləşçilərimizdən Toğrul Əsgərov (65 kq) Olimpiya Oyunlarına vəsiqə əldə ediblər. Güləşçilərimiz günü 1 bürünc medalla başa vurublar.
Yarışda 58 kiloqram çəki dərəcəsində mübarizə aparan Yuliya Ratkeviç Rusiya təmsilçisi Nataliya Qolts, Ukrayna güləşçisi Tetyna Lavrençuk üzərində qələbə qazanaraq dörddəbir finala yüksəlib. Burada Qazaxıstan güləşçisi Aiym Abdildinanı məğlub edən Yuliya Ratkeviç 2016-cı il Rio Olimpiadasına vəsiqəni təmin edib. Yarımfinalda Finlandiyadan Petra Maarit Olliyə uduzan Yuliya bürünc medal uğrunda görüşə çıxıb. Son görüşdə İsveç idmançısı Malin Yohanna Mattssonu da məğlub edən güləşçimiz dünya çempionatının bürünc medalına sahib olub.
Mundialda 65 kiloqram çəkidə mübarizə aparan Olimpiya çempionumuz Toğrul Əsgərov yarışa uğurlu başlayıb. İlk olaraq qazaxıstanlı Sayatbek Okassov, ardınca Ermənistan təmsilçisi Devid Safaryan və Gürcüstan idmançısı Avtandil Kençadzeni mübarizədən kənarlaşdıran güləşçimiz dörddəbir finalda İtaliya idmançısı Frank Çamizo ilə qarşılaşıb. Bu güləşçi ilə Toğrul ilk dəfə birinci Avropa Oyunlarının finalında qarşılaşmışdı və güləşçimiz təmiz qələbə ilə qalib gəlmişdi. Bu dəfə də görüşün 30-cu saniyəsində Toğrul rəqibinin kürəyini xalçaya sıxa bilib. Ancaq hakimlərin qeyri-obyektiv qərarı ilə görüş davam etdirilib. İtaliya idmançısının qələbəsinə və finala yüksəlməsinə şərait yaradılıb. T.Əsgərov Olimpiadaya vəsiqəni qazanmaq üçün təsəlliverici görüşə qatılıb. Polşa təmsilçisi Maqomedmurad Qadjiyevlə görüşdə əldə etdiyi üstünlük güləşçimizə Rio Olimpiadasının yolunu açıb. Toğrul Əsgərov Dünya çempionatının bürünc medalı uğrunda İran təmsilçisi Seyidahmed Mohammadi ilə qarşılaşıb, ancaq görüş rəqibin xeyrinə başa çatıb və güləşçimiz dünya çempionatını 5-ci sırada tamamlayıb.
Qeyd edək ki, bu günədək yunan-Roma güləşçilərimizdən Rövşən Bayramov (59 kq), Elvin Mürsəliyev (75 kq), Saman Təhmasibi (85 kq) və Sabah Şəriəti (130 kq), qadın güləşçilərdən Mariya Stadnik (48 kq) və Anjela Doroqan (53 kq) Olimpiya Oyunlarına vəsiqə əldə ediblər. Yunan-Roma güləşçilərimizdən Rəsul Çunayev (71 kq) qızıl, Rövşən Bayramov (59 kq) gümüş, Saman Təhmasibi (85 kq) bürünc, qadın güləşçilərimizdən Mariya Stadnik (48 kq) gümüş medala yiyələniblər.