Ölkəyə qaçaqmalçılıq yolu ilə narkotik vasitələr əsasən cənub zonasından daxil olur
Daxili İşlər Nazirliyi 3,7 tona yaxın narkotik vasitəni dövriyyədən çıxarıb
Bakı, 26 aprel, AZƏRTAC
Aprelin 26-da 1964 məhkəmə hökmü ilə barələrində məhvetmə qərarı qəbul olunmuş 4 ton 646 kiloqramdan çox müxtəlif növ narkotik vasitə, psixotrop maddə, o cümlədən 39 min ədəd çətənə bitkisi məhv edilib.
AZƏRTAC xəbər verir ki, bu sözləri jurnalistlərə açıqlamasında Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının daimi fəaliyyət göstərən işçi qrupunun rəhbəri Fəqan Şahverdiyev deyib.
“Məhv edilən narkotik vasitələrin 2 ton 568 kiloqramını heroin, 1 ton 404 kiloqramını marixuana, 228 kiloqramını tiryək, 71 kiloqramını həşiş, 519 qramdan çox kokain, 372 kiloqramını psixotrop maddə təşkil edib. Ümumiyyətlə, bu gün məhv olunan narkotik vasitələrin təqribi dəyəri 223 milyon manat civarındadır.
Ölkəyə qaçaqmalçılıq yolu ilə qanunsuz dövriyyəyə gətirilən narkotik vasitələr əsasən cənub zonasından daxil olur”, - deyə F.Şahverdiyev bildirib. Məhv edilən narkotik vasitələr 2019-cu, 2020-ci, 2021-ci, 2022-ci illərdə barələrində aidiyyəti üzrə məhkəmə instansiyaları tərəfindən məhvetmə qərarı çıxarılmışdı.
Qurumlar arasında daha çox 1300 hökm üzrə təxminən 3 ton 700 kiloqrama yaxın narkotik vasitə Daxili İşlər Nazirliyi tərəfindən qanunsuz dövriyyədən götürülüb.
Bölmənin digər xəbərləri
