Bakı, 14 avqust, AZƏRTAC

Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva avqustun 12-13-də “Gənclər-2020: Qlobal həmrəylik, davamlı inkişaf və insan hüquqları” mövzusunda Səmərqənd İnsan Hüquqları onlayn Forumunda iştirak edib. Beynəlxalq Gənclər Gününə həsr olunmuş beynəlxalq tədbir Özbəkistanın Milli İnsan Hüquqları Mərkəzi, Xarici İşlər Nazirliyi, BMT-nin bu ölkədəki nümayəndəliyi, ATƏT və digər qurumlar tərəfindən təşkil edilib.

Ombudsman Aparatının mətbuat xidmətindən AZƏRTAC-a bildiriblər ki, tədbir iştirakçılarını və təşkilatçılarını salamlayan müvəkkil müasir dövrdə gənclərin qərar qəbuletmə proseslərində iştirakının olduqca vacibliyini bildirib, bunun artıq yeni eramızın bir çağırışı olduğunu söyləyib.

Azərbaycanda müvafiq sahədə həyata keçirilən tədbirlərdən bəhs edən Səbinə Əliyeva ölkəmizdə 2002-ci ildə gənclər siyasətinə dair Qanunun qəbul olunduğunu bildirib. Diqqətə çatdırıb ki, həmin Qanunun milli səviyyədə gənclər siyasətinin əsas prinsiplərini, istiqamətlərini və hüquqi-təşkilati bazasını müəyyənləşdirir, habelə müvafiq sahədə yaranan münasibətləri tənzimləyir. S.Əliyeva bu Qanunun əsas məqsədinin gənclərin fiziki, intellektual və mənəvi inkişafına əsaslanan mühitin yaradılmasını, eləcə də onların sosial və iqtisadi problemlərinin həllini, habelə hüquq və azadlıqlarının təmin olunmasını və müdafiəsini nəzərdə tutduğunu söyləyib.

Ombudsman, həmçinin son illərdə Azərbaycan gəncliyinin qərar qəbuletmə prosesində iştirakının mühüm yer tutduğunu, ölkəmizdə bu sahədə artıq üçüncü proqram olan “Azərbaycan gəncliyi 2017-2021-ci illərdə Dövlət Proqramı”nın qəbul edildiyini vurğulayıb. Bildirib ki, gənclərin özləri də bu Proqramın implementasiyasında iştirak edirlər.

Ombudsman Azərbaycan hökuməti tərəfindən ölkə gənclərinin xaricdə təhsili ilə əlaqədar Dövlət Proqramının həyata keçirilməsi nəticəsində bir çox gəncin dünyanın müxtəlif nüfuzlu universitetlərində ali təhsil almağa şans qazandığını da vurğulayıb.

Sonra S.Əliyeva 1996-cı ildə ölkədə keçirilən ilk Gənclərin Forumunun ardınca 2 fevral tarixinin məhz Milli Gənclər Günü kimi təsis edildiyini diqqətə çatdırıb. Bildirib ki, 2019-cu ildə isə ölkəmiz qanvermə donorluğuna həsr olunmuş 19-cu Bakı Beynəlxalq Gənclər Forumuna ev sahibliyi edib.

Gənclərin sosial məsuliyyət hissinin gücləndirilməsi, fərdi inkişafının və potensialının düzgün istifadə edilməsi məqsədilə Prezident İlham Əliyevin Sərəncamı ilə 2020-ci ilin “Azərbaycanda Könüllülər ili” elan edildiyini iştirakçıların diqqətinə çatdıran müvəkkil ali təhsilli gənclərin Ombudsman təsisatında təcrübə keçmələrinə şərait yaradıldığını, beləliklə, onların Aparatın müxtəlif bölmələrində gündəlik fəaliyyətlə bağlı təcrübi biliklər qazandıqlarını vurğulayıb.

O, habelə hazırda yeni növ koronavirus infeksiyasının yayılmasının qarşısının alınması məqsədilə ölkəmizdə gənclərin və könüllülərin cəmiyyətin sosial adaptasiyasına təkan vermək üçün fəaliyyət göstərdiklərini söyləyib.

Ombudsman Aparatının müvafiq sahədəki çoxşaxəli fəaliyyətinə də toxunan müvəkkil bildirib ki, təsisat hər il 18 iyun- Milli İnsan Hüquqları Günü ərəfəsində, 18 may-18 iyun tarixləri çərçivəsində insan hüquqları üzrə aylıq kampaniya təşkil edir. Bu kampaniyaya ölkəmizin müxtəlif şəhər və rayonlarında insan hüquqlarına dair tədbirlərin keçirilməsi məqsədilə müxtəlif müvafiq dövlət qurumlarının, elm-təhsil müəssisələrinin, vətəndaş cəmiyyəti institutlarının, QHT və KİV-lərin nümayəndələri cəlb edilirlər. Cari ildəki bu kampaniyada onlayn tədbirlər vasitəsilə tələbələrin, qaçqın və məcburi köçkün ailələrindən olan gənclərin, etnik və yerli icmaların gənc nümayəndələrinin iştirakı təmin edilib. COVID-19 pandemiyası ilə əlaqədar ölkəmizdə xüsusi karantin rejiminin tətbiq olunmasına baxmayaraq, təsisat tərəfindən gənclərin onlayn maarifləndirilməsi işi davam etdirilir.

Ombudsman sülhün, inkişafın və insan hüquqlarının sıx əlaqəli olduğunu vurğulayaraq, inkişafsız sülhün, sülhsüz inkişafın, insan hüquqlarının səmərəli təmin olmadan isə bütöv bir inkişafın imkansızlığını bir daha bildirib. Bu konteksdə Səbinə Əliyeva Ermənistan-Azərbaycan Dağlıq Qarabağ münaqişəsi səbəbindən Azərbaycan gənclərinin bütün hüquq və azadlıqlarının pozulduğunu, onların qaçqın və məcburi köçkün vəziyyətinə düşdüyünü, Ermənistanın BMT-nin müvafiq qətnamələrinə məhəl qoymadan Azərbaycan ərazilərini hələ də işğal altında saxladığı üçün yeni doğulan gənc nəslin həmin yerlərə gedə bilmədiklərini diqqətə çatdırıb. Tovuzda baş vermiş son hərbi təxribatları xatırladan müvəkkil bu münaqişənin sülhə və davamlı inkişafa daim böyük zərbə olduğunu qeyd edib.

S.Əliyeva dövlətimizin bu kateqoriyadan olan gənclərə dəstəyinə baxmayaraq, həmin qaçqın və məcburi köçkün gənclərin xüsusilə təhlükəsizlik, təhsil və əmək hüquqlarının kobud şəkildə pozulduğunu, uzun sürən bu hərbi münaqişənin həmin hüquqların tam şəkildə təmininə maneələr yaratdığını söyləyib.

Sonda müvəkkil BMT-nin Ümumdünya İnsan Hüquqları Bəyannaməsini və müvafiq beynəlxalq sənədləri əldə rəhbər tutaraq, milli insan hüquqları institutlarını və ombudsman təsisatlarını gənclərin inkişafına və hüquqlarının səmərəli şəkildə təmini sahəsində iştirakına şərait yaratmağa çağırıb.