Onlayn platformalar nifrət yayan paylaşımları məhkəmə qaydasında bütün dünya üzrə silməli olacaqlar
Vyana, 3 oktyabr, AZƏRTAC
Avropa Ədalət Məhkəməsinin qərarına əsasən, “Facebook” gələcəkdə nifrət yayan paylaşımları, eləcə də hərfi və mənaca qanunazidd şərhləri bütün dünya üzrə silməyə məcbur edilə bilər.
AZƏRTAC xəbər verir ki, Avstriya Yaşıllar Partiyasının keçmiş sədri Eva Qlavişniqin şikayəti əsasında məsələyə baxan məhkəmə belə bir silinmənin yalnız məhdud ərazi və ya ölkələrdə həyata keçirilməli olmadığı qənaətinə gəlib. Qərarda bildirilir ki, Avropa İttifaqının qanunvericiliyi belə bir qadağanın bütün dünyaya şamil edilməsini əngəlləmir.
Qeyd edək ki, 2017-ci ildə E.Qlavişniqin “Facebook” sosial şəbəkəsindəki səhifələrin birində dərc olunmuş fotosunun yanında “Yaşıllar: Qaçqınlar üçün minimum gəlir vəsaiti saxlanılmalıdır” cümləsi dərc olunmuşdu. Həmin səhifədə keçmiş siyasətçinin ünvanına çoxlu sayda təhqiredici və nifrət yayan şərhlər yazılmışdı. Buna cavab olaraq Avropa Ədalət Məhkəməsinə müraciət edən E.Qlavişniq bu şərhlərin yalnız müəyyən ölkələr üzrə deyil, ümumilikdə bütün dünya üzrə silinməsinə nail olub.
Presedent rolunu oynayan bu qərar gələcəkdə onlayn platformalarda yayılan nifrət dolu paylaşım, şərh və yazıların silinməsi üçün əsas yarada bilər. Avropa Ədalət Məhkəməsinin qərarları hakimlər üçün icbari xarakter daşımasa da, praktikada presedent qərarlara istinadlar əksəriyyət təşkil edir.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
