Orta Dəhlizin Gürcüstan hissəsində yük daşımalarının həcmi 9 dəfə artıb
Tbilisi, 30 oktyabr, AZƏRTAC
Transxəzər Beynəlxalq Nəqliyyat Dəhlizinin (Orta Dəhliz) Gürcüstandan keçən hissəsində beynəlxalq yük daşımalarının həcmi 9 dəfə artıb.
AZƏRTAC xəbər verir ki, bu barədə “Transxəzər Beynəlxalq Nəqliyyat Dəhlizi” Beynəlxalq Assosiasiyasının baş katibi Heydər Abdikarimov bildirib. Onun sözlərinə görə, 2023-cü ilin yanvar-sentyabr aylarında ötən ilin müvafiq dövrü ilə müqayisədə Orta Dəhlizdə yük dövriyyəsi 89 faiz artaraq 1 milyon 900 min ton təşkil edib.
Transxəzər Beynəlxalq Nəqliyyat Dəhlizi ilə bağlı ilk sənəd Azərbaycan, Gürcüstan və Qazaxıstan nümayəndələri arasında 10 il əvvəl - 2013-cü il sentyabrın 7-də imzalanıb. Bu marşrut hazırda aktiv olaraq işləyir.
Xatırladırıq ki, Rusiyaya qarşı beynəlxalq sanksiyaların tətbiqi fonunda Qazaxıstan hakimiyyəti ixrac və tranzit yüklərinin daşınması üçün alternativ yollardan istifadə etməyə başlayıb. Bu istiqamətdə əsas marşrut məhz Orta Dəhliz hesab edilir.
Transxəzər Beynəlxalq Nəqliyyat Dəhlizi Çin, Qazaxıstan, Xəzər dənizi, Azərbaycan və Gürcüstanı, daha sonra Türkiyə və Avropa İttifaqı ölkələrini birləşdirən beynəlxalq nəqliyyat marşrutudur. Onun komponentlərinə layihədə iştirak edən ölkələrin dəniz limanları və dəmir yolları daxildir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
