“Osten” qasırğası Fransada 161 minə yaxın evi elektriksiz qoyub
Bakı, 23 oktyabr, AZƏRTAC
Oktyabrın 23-də saat 07:00-da Fransada, xüsusən də Bretanidə və Pei-de la Luar bölgəsində, habelə Normandiyada təxminən 161 min ev “Osten” qasırğası səbəbindən elektriksiz qalıb.
AZƏRTAC xəbər verir ki, dövlətə məxsus elektrik şirkəti “Enedis” şərait imkan verdikdə müdaxilə edəcəyini, 2 mindən çox işçisinin səfərbər olunduğunu bildirib.
Nəqliyyat naziri Filipp Tabaro “X” platformasında xəbərdarlıq edib: “Osten” qasırğası hazırda ölkəmizin şimal və qərb hissəsini əhatə edib”.
Fransa mediasının məlumatına görə, Finister prefekturasında qasırğanın nəticələrini aradan qaldırmaq, o cümlədən yolları təmizləmək üçün 45 yanğınsöndürən və 100-dən çox departament işçisi cəlb edilib.
Meteorologiya xidmətinin məlumatına görə, Bretanidə və Pei-de la Luar bölgəsində küləyin sürəti bütün aylıq rekordları qırıb. Uessan adasında küləyin sürəti saatda 158 kilometrə çatıb. Bretani sahilində, Kot-d'Armor departamentindəki Pluamanaş yaxınlığında isə küləyin sürəti saatda 131 kilometr olub.
Güclü küləklər, həmçinin Nantdakı Sen-Nazer və Şevir də daxil olmaqla bir neçə körpünün bağlanmasına səbəb olub. Hava limanının veb-saytına görə, cümə gününün səhəri Nant hava limanından yola düşməsi planlaşdırılan bütün “Transavia” reysləri ləğv edilib. Digər aviaşirkətlər uçuşları davam etdirir. Sena-Maritim və Kalvados çaylarını birləşdirən Normandiya körpüsü səhər saat 10:00-dan etibarən nəqliyyat üçün tamamilə bağlanıb.
Ehtiyat tədbiri olaraq, Normandiyada, habelə Bretani və şimal xətlərində qatarların hərəkəti dayandırılıb və şənbə günü fasilələr gözlənilir. Bu barədə SNCF şirkəti xəbərdarlıq edib.
Bölmənin digər xəbərləri
