Ötən ay muxtar respublikada 141 mənzil və müxtəlif təyinatlı obyekt qazlaşdırılıb
Naxçıvan, 14 may, AZƏRTAC
Muxtar respublikanın enerji təhlükəsizliyinin təmin olunmasında yaşayış məntəqələrinin və istehsalat sahələrinin təbii qazla təminatını həyata keçirmək üçün Naxçıvan Muxtar Respublikası Qaz İstismar Xidmətində təsdiq olunmuş iş planına əsasən ardıcıl tədbirlər görülür.
Xidmətdən AZƏRTAC-ın Naxçıvan bürosuna bildirilib ki, muxtar respublikanın şəhər və rayonlarından aprel ayı ərzində daxil olan müraciətlərə əsasən cəmi 141 mənzil (ev) və müxtəlif təyinatlı obyektlər qazlaşdırılıb. Bunun 137-si əhali, 4-ü isə qeyri-əhali abonentdir.
Naxçıvan şəhərində mexaniki qaz sayğaclarının smartkart tipli qaz sayğacları ilə əvəz olunması istiqaməti üzrə işlər davam etdirilib, 1 may 2020-ci il tarixə cəmi 20 min 167, o cümlədən cari ilin aprel ayında 73 qaz sayğacı quraşdırılıb.
Ötən ay Qaz İstismar Xidmətinə tabe şəhər, rayon qaz istismar idarələrinin qəza-dispetçer sahələrinin 24 saat aktiv olan 104 nömrəli qaynar xəttinə təbii qaz istehlakçılarından qaz sızması, qaz tənzimləyicilərin nizamlanması, elektron sayğacların kilidə düşməsi və qəza-bərpa işlərinə görə 906 çağırış daxil olub. Hesabat dövründə muxtar respublika qaz şəbəkəsində 625 qaz sızması aşkarlanıb, texniki istismar və texniki təhlükəsizlik qaydalarının tələblərinə müvafiq olaraq aradan qaldırılıb.
Naxçıvan Muxtar Respublikasında ötən ay yeni qaz boru xətlərinin quraşdırılması, yenidənqurma, abadlıq işlərinin də görülməsi zamanı qaz boru xətlərinin yerinin dəyişdirilməsi, yaşayış binalarında təmir-tikinti, korroziyaya uğramış yeraltı yol, qapı keçidlərinin yerüstü keçidlərlə əvəz edilməsi işlərinin görülməsi ilə əlaqədar olaraq polietilen və dəmir borulardan istifadə olunub.
Muxtar respublikada qaz istismar idarələrinin işçiləri tərəfindən qaz cihazlarından təhlükəsiz istifadə qaydaları haqqında abonentlər arasında maarifləndirmə və izahat işi aparılıb.
Bölmənin digər xəbərləri
