Pakistan mətbuatında Xocalı soyqırımı ilə əlaqədar materiallar çap edilmişdir
İslamabad, 24 fevral (AZƏRTAC). Pakistanda və xarici ölkələrdə yaşayan Pakistan icmaları arasında böyük nüfuza malik olan ingilisdilli “Daily Times”, həmçinin urdu dillində çap edilən “Daily Pardez” qəzetlərində və “Pakistan in the World” İnformasiya Agentliyində Azərbaycanın bu ölkədəki səfiri Daşqın Şikarovun “Xocalı soyqırımı. Dünya ölkələri Pakistandan örnək götürməlidirlər” sərlövhəli məqaləsi dərc olunmuşdur.
Məqalədə Ermənistanın Azərbaycana qarşı ərazi iddiaları irəli sürdüyü, 1988-ci ildən başlayaraq yüz minlərlə azərbaycanlının öz torpaqlarından didərgin salındığı bildirilmişdir. Qeyd edilmişdir ki, müstəqilliyinin ilk illərində Azərbaycan Ermənistan tərəfindən işğala məruz qalmış, hərbi təcavüz nəticəsində Azərbaycanın Dağlıq Qarabağ bölgəsi və digər 7 rayonu işğal olunmuş, on minlərlə insan öldürülmüş, yaralanmış və ya itkin düşmüşdür.
Münaqişənin hüquqi tərəfinə diqqəti cəlb edən səfir, işğalçı Ermənistanın BMT Təhlükəsizlik Şurasının 4 və BMT-nin Baş Məclisinin 3 qətnaməsinə, Qoşulmama Hərəkatı, İslam Əməkdaşlıq Təşkilatı, Avropa İttifaqı, NATO, ATƏT kimi mötəbər beynəlxalq təşkilatların qərarlarına, habelə digər müraciətlərə məhəl qoymadığını bildirmişdir.
D.Şikarov məqalədə Xocalıda törədilmiş soyqırımının Ermənistan-Azərbaycan münaqişəsinin ən qara səhifələrindən olduğunu bildirmiş, Xocalı şəhərinin 1991-ci ildən başlayaraq erməni silahlı qüvvələri tərəfindən mühasirədə saxlanıldığını və 22 il bundan əvvəl fevral ayının 25-dən 26-a keçən gecə keçmiş sovet ordusunun 366-cı motoatıcı alayının köməyi ilə hücuma məruz qalaraq tamamilə məhv edildiyini vurğulamışdır. Materiallarda deyilir ki, o gecə qocalar, qadınlar, uşaqlar, bir sözlə yüzlərlə günahsız mülki insan xüsusi qəddarlıqla öldürülmüş, minlərlə insan yaralanmış, əsir götürülmüş və ya itkin düşmüşdür.
Səfir Xocalı soyqırımının əsas iştirakçılarından biri olan Ermənistanın indiki prezidenti Serj Sarkisyan və terrorçu M.Melkonyandan sitatlar gətirərək bu kütləvi qırğının ermənilər tərəfindən düşünülmüş və əvvəlcədən hazırlanmış bir soyqırımı olduğunu sübuta yetirmişdir.
Məqalədə qeyd olunmuşdur ki, 2010-cu il aprelin 22-də İnsan Hüquqları üzrə Avropa Məhkəməsi Xocalıda törədilmiş qırğını “Hərbi cinayət və ya insanlığa qarşı cinayət” adlandırmışdır.
Müəllif 1948-ci ildə BMT-nin Baş Məclisində qəbul olunmuş “Soyqırımı cinayətinin qarşısının alınması və cəzalandırılması” Konvensiyası haqqında məlumat verərək Azərbaycanın və Ermənistanın imzaladığı bu sənədin “Soyqırımı - milli, etnik, irqi və dini qrupların tamamilə və ya qismən məhv edilmək niyyəti ilə həyata keçirilmiş aksiyadır” maddəsinə istinad etmiş və bu cinayətin məhz soyqırımı olduğunu diqqətə çatdırmışdır. Materialda Xocalıda törədilmiş soyqırımının Ermənistanın XX əsrin əvvəllərindən başlayaraq Azərbaycana qarşı yürütdüyü davamlı zorakılıqların tərkib hissəsi olduğu vurğulanmışdır.
Məqalədə Heydər Əliyev Fondunun vitse-prezidenti, Dialoq və Əməkdaşlıq uğrunda İslam Konfransı Gənclər Forumunun mədəniyyətlərarası dialoq üzrə baş əlaqələndiricisi Leyla Əliyevanın təşəbbüsü ilə “Xocalıya ədalət!” beynəlxalq məlumat və təşviqat kampaniyasının fəaliyyəti haqqında məlumat verilmişdir. Vurğulanmışdır ki, bu kampaniyanın, eyni zamanda, Azərbaycan dövləti və geniş ictimaiyyətinin Xocalı həqiqətlərinin, Ermənistanın işğalçılıq siyasətinin beynəlxalq ictimaiyyətə çatdırılması istiqamətində apardığı mühüm iş nəticəsində dünyanın bir neçə ölkəsi, nüfuzlu beynəlxalq təşkilatlar Xocalı soyqırımını tanıyan qətnamələr qəbul etmişlər.
Pakistan mətbuatında dərc edilmiş məqalədə deyilir: “Pakistan Senatı 2012-ci il fevralın 1-də Xocalı soyqırımını tanımış, bu cinayəti törədənlərin məsuliyyətə cəlb edilməsini tələb etmişdir. Senatın 2013-cü il oktyabrın 5-də qəbul edilmiş qətnaməsində isə Pakistanın Dağlıq Qarabağ məsələsindəki prinsipial mövqeyi bir daha vurğulanmışdır. Həmçinin 2014-cü il fevralın 20-də də Pakistanın 100-dən çox tanınmış ictimai-siyasi xadimi Xocalı soyqırımını bir daha yad etmiş, faciəni törədənlər ittiham olunmuşdur”.
Səfirin məqaləsi bu sözlərlə bitir: Biz, bu addıma görə Pakistana dərin minnətdarlığımızı bildirməklə yanaşı, bütün dünya ölkələrini Pakistandan örnək götürməyə çağırırıq”.
Qulu Kəngərli
AZƏRTAC-ın xüsusi müxbiri
İslamabad
Bölmənin digər xəbərləri
