Pakistanlı alim Ədəbiyyat Muzeyini ziyarət edib
Bakı, 16 sentyabr, AZƏRTAC
Pakistanın Lahor Universitetinin professoru, fars ədəbiyyatı doktoru Arif Nouşahi Nizami Gəncəvi adına Milli Azərbaycan Ədəbiyyatı Muzeyinin qonağı olub.
Bu barədə AZƏRTAC-a Ədəbiyyat Muzeyindən bildirilib.
Pakistanlı alimi AMEA Məhəmməd Füzuli adına Əlyazmalar İnstitutunun elmi işlər üzrə direktor müavini, dosent Əkrəm Bağırov müşayiət edib.
Qonaqları muzeyin direktoru akademik Rafael Hüseynov qəbul edib. Görüş zamanı Rafael Hüseynov muzeyin yaranma tarixçəsi və fəaliyyəti, muzey binasının Azərbaycanın siyasi və mədəni tarixində yeri barədə məlumat verərək ziyarətçiləri Azərbaycan Xalq Cümhuriyyətinin şanlı tarixini özündə yaşadan muzeyin “İstiqlal” zalı ilə tanış edib. O, həmçinin Azərbaycan-Pakistan dostluq əlaqələrinin daim inkişaf edərək möhkəmləndiyini və Pakistan İslam Respublikası vətəndaşlarının muzeyi ödənişsiz qaydada ziyarət etdiklərini vurğulayıb. Görüşdə iki qardaş ölkə arasında siyasi, mədəni və mənəvi bağlılıqların möhkəm təməllər üzərində qurulduğu vurğulanıb, bu əlaqələrin hərtərəfli əməkdaşlığa zəmin yaradacağı diqqətə çatdırılıb.
Görüş əsnasında akademik Rafael Hüseynov müəllifi olduğu “Söz məbədi”, “Ədəbiyyat muzeyinin xalçaları” və “Məhsəti Gəncəvi. Rübailər” (urdu dilində) kitablarını professor Arif Nouşahiyə hədiyyə edib. Rafael Hüseynovun “Məhsəti Gəncəvi. Rübailər” kitabında urdu poeziyasında şəhraşub janrından bəhs etməsi pakistanlı alimin diqqətini xüsusilə cəlb edib.
Daha sonra qonaq muzeyin Azərbaycan ədəbiyyatının qədim və zəngin tarixinin əks olunduğu ekspozisiya zallarını ziyarət edib. Onu ekspozisiya ilə muzeyin böyük elmi işçisi, filologiya üzrə fəlsəfə doktoru Gülnar Əqiq tanış edib. Pakistanlı alim Azərbaycan ədəbiyyatının Xaqani, Nizami, Füzuli, Nəsimi, Xətai kimi görkəmli ədəbi şəxsiyyətlərinin həyat və yaradıcılığı ilə bağlı materiallarla tanış olub, Azərbaycan xalqının mədəni-mənəvi irsinin zənginliyi barədə ətraflı məlumat alıb.
Sonda professor Arif Nouşahi muzeyin rəylər və təəssüratlar kitabına görüşlə bağlı xoş sözlərini yazıb. O, muzeyin Azərbaycan mədəniyyətinin və ədəbiyyatının qorunub saxlanılması yolundakı fəaliyyətini təqdir edərək, səmimi görüşə görə muzey rəhbərliyinə minnətdarlığını bildirib.
Bölmənin digər xəbərləri
