Pandemiya dövründə Naxçıvan Muxtar Respublikasında yaşayan qadınlara iqtisadi dəstək göstərilir
Naxçıvan, 13 iyun, AZƏRTAC
Naxçıvan Biznes Mərkəzində pandemiya dövründə Naxçıvan Muxtar Respublikasında yaşayan qadınlara iqtisadi dəstək göstərilməsi ilə bağlı növbəti tədbir olub.
Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin mətbuat xidmətindən AZƏRTAC-ın Naxçıvan bürosuna bildirilib ki, tədbir Azərbaycan Mikromaliyyə Assosiasiyası tərəfindən icra olunan və Avropa İttifaqının maliyyələşdirdiyi, BMT-nin İnkişaf Proqramının qismən maliyyələşdirdiyi və icra etdiyi “Genderə həssas dayanıqlı inkişaf məqsədlərinin həyata keçirilməsində vətəndaş cəmiyyətinin rolunun artırılması” adlı genişmiqyaslı proqram çərçivəsində “Qadınların dayanıqlı inkişaf üçün səlahiyyətləndirilməsi” layihəsinin davamı olaraq keçirilib.
Əvvəlcə Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin sədri Ramilə Seyidova çıxış edərək bildirib ki, ötən ildən başlayaraq Azərbaycan Mikromaliyyə Assosiasiyası və Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi tərəfindən qadınların sahibkarlıq fəaliyyətlərinin dəstəklənməsi ilə bağlı layihələr icra olunur. Belə ki, ötən il icra olunan və bir il ərzində davam edən “Qadınların dayanıqlı inkişaf üçün səlahiyyətləndirilməsi” layihəsi çərçivəsində 12 təlim keçirilib, layihənin yekununda öz uğurlu biznes planları ilə seçilən, muxtar respublikadan olan 63 qadına (o cümlədən 13 sağlamlıq imkanı məhdud qadına) 43 min 700 manat dəyərində sərmayə kapitalı verilib, həmçinin həmin qadınlarla müvafiq müqavilələr bağlanılıb.
“Bu ildə də pandemiya dövründə Naxçıvan Muxtar Respublikasında yaşayan qadınlara iqtisadi dəstək göstərilməsi məqsədilə layihə icra olunur”, - deyən Ramilə Seyidova qeyd edib ki, iyunun 11-də, ümumilikdə, 20 qadına sərmayə kapitalları ilə əlaqədar imzalanmış müqavilələr təqdim olunub. Növbəti tədbirdə isə Naxçıvan şəhərindən 5, Babək rayonundan 4, Ordubad rayonundan 8, Culfa rayonundan 2 qadın olmaqla, ümumilikdə, 19 qadına sərmayə kapitalları ilə əlaqədar imzalanmış müqavilələr təqdim olunur. Layihə çərçivəsində sərmayə kapitalının dəyərində 13 baş xırdabuynuzlu, 14 baş iribuynuzlu, 50 cücə, əkinçiliklə məşğul olmaları üçün müxtəlif növdə tərəvəz ştilləri, konservləşdirmə üçün 3 mikser, torta şəkil salmaq üçün aparat, 1 soyuducu, 3 soba, müxtəlif növdə ərzaq məhsulları və taralar, dərzilik sahəsinin inkişafı üçün 5 tikiş maşını, 1 ütü və lazım olan avadanlıqlar, 2 hana və toxuculuq ləvazimatları və alətləri, gözəllik salonu üçün mebel dəsti, 8 bərbərlik aləti və kosmetik vasitələr, zərgərliklə məşğul olmaq üçün istifadə edilən zərgərlik alətləri və kontakt aparatı, psixoloji xidmət göstərmək üçün tədris materialları, rəssamlıqla məşğul olmaq üçün ləvazimatlar alınması nəzərdə tutulub.
Qeyd olunub ki, layihə, ümumilikdə, 39 qadını əhatə edib, onlara 25 min 200 manat dəyərində sərmayə kapitalı verilib. Sərmayə kapitallarının 72 faizi ailə təsərrüfatını genişləndirmək və ya qurmaq üçün, 28 faizi isə dərzilik, bərbərlik, xalçaçılıq, rəssamlıq, zərgərlik, psixoloji xidmət sahəsi ilə məşğul olmaları üçün verilib.
Komitə sədri qadınların sahibkar kimi formalaşmasına və onların məşğulluqlarının təmin olunmasına, həmçinin bu layihənin yüksək səviyyədə, uğurla həyata keçirilməsinə göstərdiyi diqqət, qayğı və dəstəyə görə Naxçıvan Muxtar Respublikası Ali Məclisinin Sədri Vasif Talıbova dərin minnətdarlığını bildirib.
Tədbirdə Azərbaycan Mikromaliyyə Assosiasiyasının layihə rəhbəri Sevinc Rüstəmova layihə haqqında ətraflı məlumat verib, qadınlara sahibkarlıq fəaliyyətlərində uğurlar arzulayıb. O, koronavirus haqqında, onun simptomları, yayılma yolları, yoluxma riskindən qorunma tədbirləri haqqında layihə iştirakçılarına slayd vasitəsilə ətraflı məlumat verib, onlara koronavirusdan qorunma vasitələri (tibbi maska, tibbi əlcək) paylanılıb.
Layihə iştirakçıları göstərilən qayğı və dəstəyə görə dövlətimizə minnətdarlıqlarını bildiriblər.
Qeyd edək ki, tədbir mövcud vəziyyətlə əlaqədar olaraq sosial izolyasiya qaydalarına uyğun, zəruri təhlükəsizlik tədbirlərinə riayət olunmaqla keçirilib.
Bölmənin digər xəbərləri
