PEKİN–2008 OLİMPİADASI START GÖTÜRÜR
Çinin “Quş yuvası” stadionunda Olimpiya məşəlinin yandırılacağı ana cəmi bir neçə saat qalır.
Bugünkü açılış mərasimi tarixdə ən bahalı şou olacaqdır. Mərasimin baş quruluşçu rejissoru məşhur kinorejissor Çjan İmoudur. Bəzi məlumatlara görə, Olimpiya oyunlarına hazırlıq tədbirlərinə Çin 17 milyard dollar xərcləmişdir.
Bu pullar dünyada tayı-bərabəri olmayan yeni idman qurğuları və çoxyaruslu avtomobil yol ötürücüləri tikilməsinə, ən yeni rabitə sistemlərinin yaradılmasına və işə salınmasına, Çin paytaxtının rayonlarının abadlaşdırılmasına, metropoliten xətlərinin çəkilməsinə, elə həmin açılış mərasiminə, xidmət heyətinin öyrədilməsinə və başqa tədbirlərə sərf edilmişdir.
Pekin Olimpiadasında rekord sayda - 205 ölkənin idmançıları iştirak edəcəklər.
Bir şeyi dəqiq deyə bilərik: yaxın iki həftə yarımda bizi Yer kürəsinin tarixində ən bahalı idman şousu gözləyir.
2008-ci ilin Olimpiya oyunlarının açılış mərasimi ilə bağlı maraqlı məlumatlardan biri ondan ibarətdir ki, Olimpiadanın əsas himnini britaniyalı Sara Braytman və çinli Lyu Huan dueti ifa edəcəkdir. Lakin bu mahnının ingilis dilində, Çin dilində, yoxsa hər iki dildə ifa ediləcəyi hələlik sirrdir.
Bu da məlumdur ki, Olimpiada-2008-in açılış mərasiminə həsr edilmiş qala-tamaşa üç saat yarım davam edəcəkdir. Əvvəlcə fou adlanan qədim Çİn zərb aləti səslənəcəkdir.
Bir saatlıq “əsas” tamaşa iki hissədən ibarət olacaqdır: “böyük sivilizasiya” və “şanlı era”. Şounun 15 minə yaxın iştirakçısı Çin sivilizasiyasının qədim dövrlərdən başlamış zəmanəmizə qədər keçdiyi yolu təsvir edəcəkdir.
Tamaşa zamanı Çinin dünyaya bəxş etdiyi 4 böyük kəşf (barıt, kompas, kağız və kitab çapı) xüsusi vurğulanacaqdır: Tamaşaçılar Böyük İpək yoluna, yazıya, Çin operasına və rəngkarlığına həsr edilmiş süjetlərə də baxacaqlar. Mərasim iştirakçıları stadionun yaşıl meydanında Çin təsviri sənətinin əsas şedevrlərindən birinin böyüdülmüş ölçüdə surətini yaradacaqlar. Bu, XI əsrdə yaşamış rəssam Van Simenin “Min li dəyərində çaylar və dağlar” adlı əsəridir.
Bundan sonra olimpiyaçıların paradı başlanacaq, daha sonra Beynəlxalq Olimpiya Komitəsinin prezidenti və Olimpiada-2008-in Təşkilat Komitəsinin sədri mərasim iştirakçılarına müraciət edəcək, idmançıların və hakimlərin təntənəli andiçmə mərasimi olacaq, Olimpiya məşəli yandırılacaq, atəşfəşanlıq başlanacaqdır.
Oyunların açılışında rekord sayda - 100-ə yaxın xarici ölkənin dövlət və hökumət başçıları iştirak edəcəkdir.
39 idman növü üzrə yarışlarda 10.500 idmançı iştirak edəcək, onlar 302 dəst mükafat uğrunda mübarizə aparacaqlar. Oyunları dünyanın 200-dən çox teleşirkəti işıqlandıracaqdır. Açılış mərasimini bütün dünyada təxminən 4 milyard televiziya tamaşaçısının izləyəcəyi gözlənilir.
Azərbaycan bu Olimpiadaya rekord sayda - 39 lisenziya qazanmışdır. Bütünlükdə isə, 44 idmançımız olimpiya medalları uğrunda mübarizə aparacaqdır. Atçılıq idmanı üzrə yarışlarda, eləcə də bədii gimnastika üzrə qrup halında komanda birinciliyində ölkəmiz ilk dəfə təmsil olunacaqdır.
Olimpiadanın Təşkilat Komitəsinin qərarına əsasən, iştirakçı ölkələrin yığma komandaları stadiona Çin əlifbası sırası ilə çıxacaqlar. Azərbaycan yığması stadiona 111-ci komanda kimi daxil olacaqdır.
Bölmənin digər xəbərləri
