PEKİNDƏ CÜDO ÜZRƏ OLİMPİYA TURNİRİNİN PÜŞKATMA MƏRASİMİ KEÇİRİLMİŞDİR
AZƏRTAC xəbər verir ki, Azərbaycan cüdoçularının Olimpiya yarışlarında rəqibləri müəyyən edilmişdir. Püşkatmanın nəticələrinə görə, Ramil Qasımov (66 kiloqram) avqustun 10-da 1/16 finalda 2008-ci ilin Avropa çempionatının bürünc mükafatçısı rusiyalı Alim Qadanovla görüşəcəkdir.
Kifayət Qasımova (57 kiloqram) 1/8 finalın ilk görüşündə Yaponiya cüdoçusu, 2007-ci ilin Asiya çempionu və ötənilki dünya çempionatının bürünc mükafatçısı Ayko Sato ilə qarşılaşacaqdır.
Elnur Məmmədli (73 kiloqram) 1/16 finalda hazırkı Avropa çempionu, belçikalı Dirk Van Tixelt ilə yarışacaq. Elnur və Kifayət tatamiyə avqustun 11-də çıxacaqlar.
Mehman Əzizov (81 kiloqram) avqustun 12-də 1/16 finalda 2005-ci ildə Avropa birinciliyinin qalibi olmuş alman Ole Bişofla görüşəcəkdir.
Avqustun 13-də Elxan Məmmədov (90 kiloqram) mübarizəyə qoşulacaqdır. 1/16 finalda onun rəqibi tacikistanlı Nemətullo Asranqulov olacaqdır.
Nəhayət, avqustun 14-də Mövlud Mirəliyev (100 kiloqram) 1/16 finalda əlcəzairli Həsən Əzzunla qarşılaşacaqdır.
Bölmənin digər xəbərləri
