PİANOÇU MURAD HÜSEYNOV PARİS SƏHNƏSİNDƏ ÇIXIŞ ETMİŞDİR
Murad Hüseynov Rusiya Mədəniyyəti Mərkəzinin təşkilatçılığı ilə “Birlik ulduzları” layihəsi çərçivəsində verilmiş ilk konsertdə iştirak etmişdir.
“Birlik ulduzları” layihəsindən məqsəd Rusiyanın və MDB-nin digər ölkələrinin zəngin musiqi mədəniyyətlərini birləşdirmək, XXI əsrin ifaçılıq sənətinin səviyyəsini müəyyənləşdirən ifaçılıq məktəbləri, bədii üslub və janrlarla tanış olmaqdır. İstedadlı pianoçuları səylə seçən layihə təşkilatçıları böyük ümidlər verən Murad Hüseynov üzərində dayanmışlar. Mötəbər beynəlxalq müsabiqələrin yüksək mükafatlarının gənc sahibləri Paris səhnəsində ilk dəfə görüşmüşlər.
Bu, Murad Hüseynovun Parisdə ilk çıxışı deyildir. O, burada solo konserti vermiş, dəfələrlə müxtəlif konsert proqramlarında çıxış etmişdir. M.Hüseynov 2002-ci ildə A.Korto adına Paris Ali Musiqi Məktəbinin aspiranturasını bitirmişdir. Hazırda P.Çaykovski adına Moskva Dövlət Konservatoriyasının assisent-stajkeçənidir və eyni zamanda Bakı Musiqi Akademiyasının xüsusi fortepiano kafedrasında dərs deməklə yanaşı, konsert fəaliyyətini də davam etdirir.
M.Hüseynov Tbilisidə pianoçuların Birinci Beynəlxalq müsabiqəsinin diplomantı, Qalliardda (Fransa) Birinci Beynəlxalq müsabiqənin laureatı, Fransada pianoçuların F.Pulenk adına Üçüncü Beynəlxalq müsabiqəsinin laureatıdır.
Bölmənin digər xəbərləri
