Pirallahı adasında “Xəzər həftəsi”nə həsr olunmuş tədbir keçirilmişdir
Bakı, 26 sentyabr (AZƏRTAC). Azərbaycan Respublikası Dövlət Neft Şirkətinin (ARDNŞ) ekologiya idarəsi və “Azneft” İstehsalat Birliyinin “Abşeronneft” neft-qaz çıxarma idarəsinin əməkdaşları tərəfindən Xəzər dənizi sahili ərazilərdə təmizlik aksiyası təşkil olunmuşdur.
AZƏRTAC xəbər verir ki, tədbir şirkətin ekoloji maarifləndirmə və təbliğat proqramına uyğun olaraq keçirilmişdir. Çıxış edənlər ekoloji maarifləndirmə tədbirlərinin əhəmiyyətini vurğulamış, diqqəti mədən ərazilərindəki təmizlik işlərinin aparılmasına yönəltmiş və bu işdə analoji aksiyaların rolunu qeyd etmişlər. Tədbir zamanı Pirallahı adasında Xəzərin sahilboyu ərazilərində təmizlik işləri aparılmış, toplanılan zibil çeşidlənərək qablaşdırılmış və müvafiq qaydada ərazidən kənarlaşdırılmışdır.
BMT-nin qərarı ilə 1978-ci ildən etibarən hər il sentyabr ayının sonuncu həftəsi Beynəlxalq Dəniz Günü kimi qeyd olunur. Bu tədbirin məqsədi dünyada cəmiyyətin, dövlətin və özəl sektorun diqqətini dənizin və onun bioresurslarının qorunması probleminə yönəltməkdir. Bununla əlaqədar hər il sentyabr ayının son həftəsi respublikamızda da “Xəzər həftəsi” elan olunur.
Bölmənin digər xəbərləri
