PLANETİMİZDƏ ON MİLYONLARLA GƏNCİ YOXSULLUQ, EPİDEMİYA VƏ İŞSİZLİK GÖZLƏYİR
1995-2005-ci illərdə Yer kürəsinin gənc nəslinin sayı 1 milyard 25 milyondan 1 milyard 153 milyona çatmışdır. Hazırda planet əhalisinin 18 faizini gənclər təşkil edirlər.
Gənclər arasında yoxsullar, əsasən, Cənubi Asiya ölkələrində qeydə alınmışdır. Burada günü 1 dollara 84 milyon, bundan az məbləğə isə 206 milyon gənc yaşayır. Şərqi Avropa və Orta Asiya ölkələri üçün bu göstərici müvafiq surətdə 4,1 və 18,2 milyon nəfərdir.
Gənclərin indiki nəsli bəşəriyyət tarixində ən savadlı nəsildir. Lakin heç də bütün ölkələrdə gənclərin hətta ibtidai təhsil almaq imkanı yoxdur. Keçid iqtisadiyyatlı dövlətlərə, o cümlədən MDB ölkələrinə gəldikdə isə, burada ibtidai təhsil sistemində geriləmə nəzərə çarpır.
Məruzənin müəllifləri gənclərin rifahı üçün təhlükə törədən amillər kimi İÇVQİÇS, cinayətkarlıq, silahlı münaqişələr və narkomanlıqdan xüsusi narahatlıqla söz açırlar. Keçmiş SSRİ-nin bir sıra respublikalarında narkotik maddələri inyeksiya yolu ilə qəbul edən gənclərin sayı Qərbi Avropa ölkələrindəkindən 10 dəfə çoxdur. Orta Asiyada və Şərqi Avropada inyeksiyaya əl atan narkomanların dörddə biri yaşı 20-dən az olan gənclərdir.
Məruzədə keçid iqtisadiyyatlı ölkələrin gəncləri arasında cinayətkarlığın xeyli artmasından da narahatlıq ifadə olunur. 1995-ci ildən bu ölkələrin bir çoxunda yeniyetmələr arasında cinayətkarlığın səviyyəsi 3 dəfədən çox artmışdır. BMT ekspertləri problemin köklərini alkoholizmdə və narkomanlıqda görürlər.
