Bakı, 1 fevral, AZƏRTAC

Prezident İlham Əliyevin Gəncə şəhərinə səfəri on səkkiz illik hakimiyyəti dövründə 18-ci səfəri idi. Əlbəttə, Gəncə həm böyüklüyünə, həm də tarixi şəhər olmasına görə dövlətimizin diqqəti mərkəzindədir. Gəncə, həmçinin xanlıqlar dövründən Rusiya işğalına qədər, istərsə də 1918-ci ildən sovet dövrünə qədər müxtəlif proseslərin baş verdiyi şəhərdir. Digər tərəfdən, Gəncə Ermənistanın diqqət mərkəzində olan şəhərlərimizdən biridir. Eyni zamanda, Gəncə nəqliyyat, logistika, kommunikasiya xətlərinə yaxınlığı ilə seçilir. Beləliklə, Gəncənin öz ictimai-siyasi, strateji əhəmiyyəti var. Təsadüfi deyil ki, Ermənistan 44 günlük Vətən müharibəsində Qarabağdan və Şərqi Zəngəzurdan uzaq məsafədə yerləşən Gəncəyə 13 raket ataraq insan tələfatına və dağıntılara səbəb oldu. Dövlətimizin başçısının Gəncəyə səfəri zamanı Ermənistanın şəhərə raket zərbələri endirməsindən danışması və evləri dağıdılmış, həmçinin zərər görmüş insanlara müharibədən dərhal sonra yeni evlərin verilməsi, maddi yardımın edilməsi dövlətimizin bu məsələyə diqqətlə yanaşmasının göstəricisidir.

Bu fikirləri AZƏRTAC-a açıqlamasında politoloq Zaur Məmmədov söyləyib.

Politoloq bildirib ki, Ermənistanın raket zərbəsi ilə dağıtdığı ərazidə Memorial Kompleksin yaradılması erməni vandalizmi ilə bağlı məlumatların gələcək nəsillərə ötürülməsi istiqamətində önəmli addımdır. Həmçinin gələcəkdə Gəncə şəhərinə gələn xarici vətəndaşlar müxtəlif yerlədə olduğu kimi, burada da ermənilərin iç üzünü əyani şəkildə görəcəklər. Eyni zamanda, beynəlxalq təşkilatların nümayəndələrinin, müxtəlif rəsmi şəxslərin Gəncə Memorial Kompleksini ziyarət etmələrinə imkan yaradılacaq. Bundan əlavə, gələcək nəsillər Gəncəyə Ermənistan tərəfindən atılan raketlər nəticəsində törədilən dağıntıları, fəlakətin miqyasını, insanların həlak olması haqqında məlumatları buradan alacaqlar.

“Azərbaycan Prezidenti Gəncəyə səfəri zamanı Ermənistana növbəti dəfə xəbərdarlıq xarakterli mesaj göndərdi. Bildirdi ki, Ermənistanın sərhədlərimizə yaxın yerlərdə ordu yaratmasına, təxribata hazırlaşmasına Azərbaycan dövləti imkan verməyəcək. Həmçinin qonşu ölkədən bizə qarşı sağlam fikir olmayacaqsa, təxribat xarakterli davranışlar sərgilənəcəksə, Azərbaycan Ermənistanın başını necə əzmək lazım olduğunu çox yaxşı bilir”, - deyə Zaur Məmmədov vurğulayıb.

O əlavə edib ki, dövlətimizin başçısının Gəncəyə səfəri zamanı bir çox obyektlərin açılışı da baş tutdu. Bunlardan ən vacibi “ASAN xidmət”in yeni binasının açılışı idi. Mərkəzin açılışı yerli əhaliyə, həmçinin qonşu rayonlarda yaşayan insanlara göstərilən sosial xidmətlərə əlçatanlığın asanlaşması baxımından mühüm əhəmiyyət daşıyır. Eyni zamanda, Prezident İlham Əliyev “Azərbaycan Dəmir Yolları” QSC-nin Gəncə lokomotiv deposunun istismara verilməsindən də danışdı. Qeyd etdi ki, burada 75 nəfər işlə təmin olunacaq. Bundan əlavə, dövlətimizin başçısı Azərbaycanda ən böyük idman sarayı olacaq Gəncə İdman Sarayında tikinti işləri ilə də tanış oldu. Bu da ölkəmizdə idmana göstərilən diqqət və qayğını özündə əks etdirir. Gənclərimizin sağlamlıqları baxımından bu idman sarayının böyük faydası olacaq.

“Kəlbəcərə gedən yollardan biri Gəncədən keçir. Kəlbəcərə daha rahat və tez getmək üçün Murovdağ tunelinin tikintisi davam etməkdədir. Bu tunel, eyni zamanda, böyük strateji əhəmiyyətə malik olaraq gələcəkdə uğurlu işlərin görülməsində əlçatanlığı təmin edəcək”, - deyə politoloq qeyd edib.