Politoloq: Ermənistanın mina terroru azərbaycanlıların öz yurdlarına qayıtmasını gecikdirmək məqsədi daşıyır
Bakı, 29 aprel, AZƏRTAC
Otuz illik erməni işğalı dövründə Azərbaycanın şəhərləri, tarixi və milli-mənəvi dəyər təşkil edən abidələri dağıdıldı. Ermənistan beynəlxalq hüquqda ən ağır cinayətlər kimi təsnif edilən genosid, urbisid və ekosid cinayətlərini ölkəmizə qarşı tətbiq etdi. Azərbaycan təbiətinə ən ağır zərbə də bu illər ərzində məhz Ermənistan tərəfindən vuruldu. Ölkəmizin meşələri qırıldı, çaylarımız bilərəkdən kimyəvi zəhərlənməyə məruz qaldı.
Bu fikriləri AZƏRTAC-a açıqlamasında politoloq Amid Əliyev söyləyib.
O qeyd edib ki, bu gün də erməni barbarlarının və vandallarının Azərbaycana qarşı terroru davam edir. Məzmun və formasına görə ən ağır terror cinayəti Qarabağ iqtisadi rayonunda davam edir. Belə ki, Qarabağ müharibəsindən qalan gizli ölüm kimi tanınan mina təhlükəsi, demək olar, hər gün can almaqda davam edir. İkinci Qarabağ müharibəsi bitən gündən indiyə qədər 300-ə yaxın vətəndaşımız mina qurbanı olub ki, onlardan da 54 nəfəri ölüb. Bütün bunlar gecə-gündüz Azərbaycanı nədəsə günahlandırmağa çalışan beynəlxalq təşkilatların və dünya ictimaiyyətinin gözü qarşısında baş verir. Yenə də eyni nəticə: susqunluq, münasibət bildirməmək və kor olan beynəlxalq hüquq.
"İki ildir Qarabağ iqtisadi rayonunda ermənilərin hüquqlarını müdafiə edərək sinələrini qabağa verən hüquq müdafiəçiləri, qrant təşkilatları və aktivistlər nədənsə indi susur. BMT, Avropa Şurası, Avropa İttifaqı və "Human Rights Watch" kimi qurumlar faktlara əsaslanan reallıqları görməzdən gəlir. Ermənistan bu günə qədər ərazilərin dəqiq mina xəritələrini bilərəkdən Azərbaycana təqdim etməyib. Çünki əsas məqsəd Azərbaycan tərəfindən başladılan bərpa və yenidənqurma işlərini ləngitmək, azərbaycanlıların öz ata-baba yurdlarına qayıtmasını gecikdirmək və nəhayət, bölgədə ümumi təhlükəsizliyi sarsıtmaqdan ibarətdir.
Ermənistan bu addımları ilə mina əleyhinə olan beynəlxalq konvensiyaları və 2022-ci il 10 noyabr tarixli Üçtərəfli Bəyanatı kobud şəkildə pozur. Çünki ərazilərimizdə aşkarlanan minaların bəziləri 2021-ci ildə Ermənistanda istehsal olunub",- deyə A.Əliyev vurğulayıb.
O əlavə edib ki, Azərbaycan dövləti mina cinayətlərini beynəlxalq məhkəmədə Ermənistanın mühakimə olunması üçün təqdim edəcək.
Bölmənin digər xəbərləri
