Prezident İlham Əliyevin Şərqi Zəngəzurda müasir şəhərsalma və məskunlaşma siyasəti - ŞƏRH
Bakı, 11 may, AZƏRTAC
Şərqi Zəngəzur regionu bu gün Azərbaycanın strateji baxımdan ən vacib istiqamətlərindən birinə çevrilib. Prezident İlham Əliyevin Zəngilana, xüsusilə də Ağalıya və digər yaşayış məntəqələrinə növbəti səfərləri bunun daha bir göstəricisidir.
Bu barədə AZƏRTAC-a açıqlamasında Milli Məclisin deputatı Nigar Arpadarai söyləyib.
Nigar Arpadarai bildirib ki, Zəngilan rayonu və ümumilikdə Şərqi Zəngəzur 30 ilə yaxın müddətdə işğal altında olmuş və Azərbaycanın nəzarətindən kənarda qalmış bir region idi. Bu gün isə azadlıqdan sonra həmin ərazilərin bərpası, yenidən qurulması və inkişafı ilə onların əhəmiyyəti sürətlə artır.
“Hazırda bu region ətrafında bir sıra böyük strateji təşəbbüslər formalaşır. Təbii ki, onların ən böyüyü Zəngəzur dəhlizidir — Azərbaycanın əsas hissəsini Naxçıvanla birləşdirəcək nəqliyyat xətti. Amma daha geniş mənada baxsaq, bu bölgə bütün regional ticarət və logistika üçün mühüm əhəmiyyət daşıyır”, - deyə Nigar Arpadarai əlavə edib.
Milli Məclisin deputatı qeyd edib ki, bu ərazilər Türkiyə ilə əlavə və effektiv nəqliyyat bağlantılarının qurulması baxımından vacibdir. Eyni zamanda, İranla əməkdaşlıq və ticarət üçün önəmli platformadır. Hətta gələcəkdə Azərbaycanın Yaxın Şərq bazarlarına çıxışı baxımından da ciddi potensiala malikdir.
“Bu səbəbdən regionun bərpası, insanların orada yenidən yaşaması və işləməsi ilə yanaşı, onun tranzit və nəqliyyat statusunun yüksəldilməsi xüsusi əhəmiyyət daşıyır.
Əgər diqqət yetirmisinizsə, Prezident də məhz buna görə Şərqi Zəngəzur regionuna çox böyük diqqət ayırır”, - deyə N.Arpadarai vurğulayıb.
Nigar Arpadarai qeyd edib ki, maraqlı məqamlardan biri də odur ki, hər region üçün fərqli memarlıq və üslub yanaşması seçilib. “Məsələn, Zəngilanda tikilən yaşayış kompleksləri müəyyən qədər Aralıq dənizi bölgəsinin memarlığını xatırladır. Burada daha çox ağ rəngli, aşağı mərtəbəli və estetik baxımdan rahat görüntüyə malik binalar inşa edilib.
Eyni yanaşmanı digər şəhərlərdə də görürük. Şuşa tam şəkildə tarixi simasına uyğun şəkildə bərpa olunur. Ağdamda ağ rəng dominant memarlıq elementinə çevrilib. Zəngilanda isə artıq özünəməxsus yeni bir üslub və şəhər kimliyi formalaşır.
Ən gözəl tərəfi də budur ki, uzun illər dağıntı yaşamış bu bölgələrin hər biri indi öz simasını və öz memarlıq üslubunu yenidən qazanır. Və bu üslub həm tarixi irsə söykənir, həm də müasirlik və innovasiya ilə düzgün şəkildə birləşdirilir”, - deyə Nigar Arpadarai əlavə edib.
Müxbir - Pərvanə Qafarova
Bölmənin digər xəbərləri
