Prezident İlham Əliyev: Bizim prinsipial mövqeyimizə heç bir qüvvə təsir edə bilməz
Dövlətimizin başçısı deyib: “Siyasi, diplomatik, iqtisadi, hərbi amillər burada əsas rol oynayır. Mən dəfələrlə demişəm, bir də demək istəyirəm ki, demoqrafik amil də az rol oynamır”.
Prezident İlham Əliyev qeyd edib ki, Ermənistanın rəsmi statistikasına görə, təkcə bu ilin doqquz ayında ölkə əhalisi 80 min nəfər azalıb. Yəni 80 min erməni vətəndaşı ölkədən gedib və qayıtmayıb. Bu meyl ilin sonuna qədər davam edəcək və beləliklə, Ermənistanda 100 mindən artıq əhali azalacaq. Azərbaycan əhalisi isə artır və artacaq. Bu da öz növbəsində gələcəkdə Ermənistan-Azərbaycan, Dağlıq Qarabağ münaqişənin həlli üçün və ümumiyyətlə, regional mənzərə üçün əsas rol oynayacaq.
Dövlətimizin başçısı bildirib ki, Ermənistan vətəndaşlarının kütləvi şəkildə ölkədən getməsinin bir neçə səbəbi var: korrupsiya, diktatura rejimi, biznes imkanlarının məhdud olması, işsizlik, yoxsulluq. Əlbəttə ki, təmas xəttində son hadisələrdən sonra bu kütləvi köç daha da geniş vüsət almışdır.
Prezident əlavə edib ki, əgər Ermənistan bir daha təxribata əl atsa, yenə də layiqli cavab alacaq və görəcək ki, bu təxribat yeni köç dalğasına təkan verəcək. “Bir sözlə, bir də demək istəyirəm ki, Azərbaycan ictimaiyyəti də bilsin, biz öz prinsipial mövqeyimizdən geri çəkilməyəcəyik. Çalışırıq, çalışacağıq ki, məsələ öz həllini tapsın və tapacaqdır”, - deyə dövlətimizin başçısı bildirib.
Bölmənin digər xəbərləri
