PREZİDENT İLHAM ƏLİYEV QAZIQUMLAQ KƏNDİNDƏKİ ŞADLIQ EVİNDƏ KEÇİRİLƏN TOY MƏRASİMİNDƏ İŞTİRAK ETMİŞDİR
Prezident İlham Əliyev iyunun 29-da Ucar rayonunun Qazıqumlaq kəndində yeni istifadəyə verilmiş şadlıq evində keçirilən toy mərasimində iştirak etmişdir.
Dövlətimizin başçısı və xanımı şadlıq evinin qarşısında ulu öndər Heydər Əliyevin büstü önünə gül dəstələri qoydular.
Prezidentə məlumat verildi ki, 460 yerlik şadlıq evində bu gün ilk toy mərasimi keçirilir. Toya gələnlər əziz qonaqları hərarətli alqışlarla qarşıladılar.
Prezident İLHAM ƏLİYEV yeni ailə quran gənclərə müraciətlə dedi:
- Əziz balalar! Mən sizi bu gözəl toy mərasimi münasibətilə ürəkdən
təbrik edirəm. Siz bu gün ailə qurursunuz, birgə həyata başlayırsınız. Qoy sizin yolunuz həmişə açıq olsun, həmişə bir-birinizə dayaq olasınız, həmişə birlikdə olasınız. Bu, çox gözəl hadisədir. Azərbaycanda yeni ailə yaranır, yeni ailə qurulur. Əlbəttə ki, Azərbaycanda gedən bütün proseslər, görülən işlər imkan verir ki, cavanlar gələcəyə daha da inamla baxsınlar, ailə qursunlar, xoşbəxt yaşasınlar. Bu il Azərbaycanda böyük quruculuq işləri gedir. Mən bu gün bu kənddə bir neçə yerdə olmuşam. Görürəm ki, kənd abadlaşır. Mən bir müddət bundan əvvəl qarşıya vəzifə qoymuşdum ki, kəndlərin səviyyəsi şəhər səviyyəsinə yaxınlaşmalıdır, çatmalıdır. Kəndlə şəhər arasında fərq çox az olmalıdır. Biz bu gün bunu bu kənddə görürük. İndi burada ən müasir xəstəxana fəaliyyət göstərir. Məktəb, gözəl şadlıq evi, gözəl yollar, xiyaban, elektrik enerjisi - hər şey var. Üstəlik, bu gözəl məclis. Bu onu göstərir ki, Azərbaycan yaşayır, Azərbaycan inkişaf edir. Ölkəmiz hərtərəfli inkişaf edir. Çünki ölkəmizin gücü, qüdrəti məhz bundadır. Şəhər, rayon, kənd - budur Azərbaycanın inzibati quruluşu. Mən həmişə deyirəm, əgər hər bir kəndin problemi həll olunarsa, deməli, bütün ölkəmizin problemləri həll edilmiş olur. Bu gün mən bunu bu gözəl məclisdə görürəm. Mən bu gün çox böyük sevinc içindəyəm.
Ucar rayonu inkişaf edir, burada gözəl abadlıq-quruculuq işləri görülür, ab-hava yaxşıdır, əhval-ruhiyyə yüksəkdir. Budur bu gün Azərbaycanı səciyyələndirən amillər. Ölkədə vətəndaş birliyi var, inkişaf, iqtisadi irəliləyiş var, sabitlik, sülh var, insanlar rahat, təhlükəsizlik, əmin-amanlıq şəraitində yaşayırlar. Biz hamımız çalışmalıyıq ki, bu gözəl işlər davam etdirilsin, ölkəmiz daha da möhkəmlənsin, müasirləşsin, səviyyə yüksəlsin. Bu, gözəl şadlıq evidir. Mən bu gün sizə deyirəm, yəqin ki, başqa rayonlardan da gəlib burada toy məclislərini keçirmək istəyənlərin sayı az olmayacaqdır. Bütün bölgələrdə, bütün kəndlərdə belə gözəl şərait olmalıdır. Biz buna doğru gedirik. Biz irəliyə gedirik və əlbəttə ki, gənc nəslin fəaliyyətindən çox şey asılıdır. Ona görə təhsilə böyük diqqət göstərilməlidir. Gənc nəsil vətənpərvərlik ruhunda tərbiyə olunmalı, gözəl şəraitdə yaşamalıdır. Bu gün bu iki gəncin birləşməsində həm də böyük məna var. O məna ki, Azərbaycan xalqı yaşayır, yaxşı yaşayır, bundan da yaxşı yaşamalıdır və biz bunu təmin edəcəyik.
Sizi bir daha ürəkdən təbrik edirəm, sizə xoşbəxtlik arzulayıram. Bütün Ucar sakinlərinə xoşbəxtlik, əmin-amanlıq, inkişaf arzulayıram. Mən də öz tərəfimdən çalışacağam ki, Azərbaycanın inamlı inkişafı daha da sürətlə getsin, ölkəmiz daha da möhkəmlənsin, insanlar daha da yaxşı yaşasınlar. Sağ olun.
X X X
Prezidentin təbriki böyük diqqətlə dinlənildi və alqışlarla qarşılandı. Sonra məclisdə Azərbaycan Prezidentinin şərəfinə gözəl şeirlər və mahnılar səsləndi.
Bölmənin digər xəbərləri
