Prezident İlham Əliyevin müsahibəsi dünya ictimaiyyəti tərəfindən diqqətlə izlənilir ŞƏRH
Bakı, 8 yanvar, AZƏRTAC
Prezident İlham Əliyev Qərbi Azərbaycana qayıdışla bağlı bütün çıxışlarında hər zaman qətiyyətli və prinsipial mövqe nümayiş etdirib. Ölkə rəhbərinin yanvarın 7-də yerli televiziya kanallarına verdiyi geniş müsahibə tarixi həqiqətlərimizin dünya ictimaiyyətinə çatdırılması istiqamətində olduqca əhəmiyyətlidir. Bilindiyi kimi, Azərbaycan beynəlxalq münasibətlər sistemində müstəqil xarici siyasət strategiyasına sahib azsaylı dövlətlərdən biridir. Biz, digər ölkələrin daxili işlərinə qarışmadan milli maraqlarımız fonunda qlobal arenada bərabərhüquqlu tərəfdaşlıqların inkişafında maraqlıyıq. Azərbaycanın yüksələn nüfuzu və qazandığımız qələbələrin sirri birmənalı olaraq Prezident, Müzəffər Ali Baş Komandan İlham Əliyevin adı ilə bağlıdır. Onun çıxışları və verdiyi müsahibələr dünya ictimaiyyəti tərəfindən hər zaman böyük rəğbət və diqqətlə izlənilir.
Bu sözləri AZƏRTAC-a açıqlamasında Milli Məclisin deputatı Günay Ağamalı söyləyib.
O bildirib ki, dövlətimizin başçısı regionda dəyişən yeni geosiyasi reallıqlar çərçivəsində Qərbi Azərbaycana qayıdış strategiyasını siyasi təzyiq vasitəsi deyil, prioritet məsələ kimi qiymətləndirir. Bu isə ölkə vətəndaşlarında və taleyin acı hökmü ilə həmin torpaqlardan zorla qovulan soydaşlarımızda böyük qayıdışla əlaqədar nikbin fikirlər formalaşdırır, ümidlərimizi artırır.
“Keçən dövr ərzində Ermənistan rəhbərliyi sistematik və planlı şəkildə tarixi torpaqlarımızdan bizlərə məxsus izləri silməyə çalışsa da, buna tam şəkildə nail ola bilməyib. Ermənilərin Azərbaycanın qərb bölgələrinə köç etdirilməsi və bundan sonra qeyri-təbii formada etnik tərkibin dəyişdirilməsi bütün tarixi mənbələrdə öz əksini tapmaqdadır. Məhz həmin tarixi faktlar əsasında bu gün Ermənistan cəmiyyəti və rəhbərliyi arasında qorxu və narahatlıq hökm sürür. Prezident İlham Əliyevin tutarlı və əsaslı fikirlərinə qarşı baş nazir Nikol Paşinyan uydurma Ermənistan yalanlarını aktuallaşdırmağa cəhdlər edir və Qərbi Azərbaycan həqiqətlərini fərqli istiqamətə yönəltmək istəyir. Lakin dövlətimizin başçısının son çıxışında səsləndirdiyi fikirlər onu göstərir ki, Azərbaycanın Qərbi Azərbaycanla bağlı yanaşması qətidir və beynəlxalq hüquq soydaşlarımızın öz torpaqlarına geri qayıtmasını birmənalı şəkildə təsdiq edir”, - deyə G.Ağamalı vurğulayıb.
Deputat əlavə edib ki, mülki əhalinin zorla köçürülməsini qadağan edən Cenevrə Konvensiyası, hər bir insanın öz torpaqlarına qayıtmaq hüququnu təsdiq edən Ümumdünya İnsan Hüquqları Bəyannaməsi və bununla bağlı BMT-nin qətnamələri Azərbaycanın addımlarının hüquqi çərçivədə olduğunun sübutudur.
Bölmənin digər xəbərləri
