“Primatların sosial strukturu: sosial beyin hipotezi” - elmi seminar
Bakı, 24 dekabr, AZƏRTAC
Bakı Dövlət Universitetinin (BDU) Biologiya fakültəsində elmi-tədqiqat fəaliyyətinin gücləndirilməsi məqsədilə növbəti elmi seminar təşkil olunub.
BDU-dan AZƏRTAC-a bildirilib ki, seminarda Zoologiya və fiziologiya kafedrasının dosenti Sevinc Hümbətova “Primatların sosial strukturu: sosial beyin hipotezi” mövzusunda məruzə edib. Məruzəçi primatların sosial davranışlarının təkamül baxımından əsas xüsusiyyətlərini geniş şəkildə təhlil edib. Qeyd olunub ki, primatların sosial sistemləri sadə, müvəqqəti assosiasiyalardan tutmuş mürəkkəb, sabit və çoxsəviyyəli cəmiyyətlərə qədər geniş diapazonda dəyişir. Müasir elmi araşdırmaların nəticələrinə əsaslanaraq vurğulanıb ki, primatlarda ilkin sosial həyat forması tək yaşayış deyil, məhz cüt halında yaşam olub. Bu fakt sosial qarşılıqlı əlaqələrin təkamül prosesində mühüm rol oynadığını bir daha təsdiqləyir.
Sevinc Hümbətova çıxışında sosial beyin hipotezinin mahiyyətinə toxunaraq beyinin ölçüsü, idrak qabiliyyəti və sosial münasibətlərin mürəkkəbliyi arasında sıx əlaqənin mövcud olduğunu diqqətə çatdırıb. Bildirilib ki, sosial əlaqələrin artması beyinin inkişafına təkan verən əsas amillərdən biri kimi çıxış edir və bu, xüsusilə primatlarda aydın şəkildə müşahidə olunur.
Bölmənin digər xəbərləri
