QARA DƏNİZİN DİBİNDƏ DÜNYADA YEGANƏ SUALTI ÇAY AŞKAR EDİLMİŞDİR
Bakı, 5 avqust (AZƏRTAC). Britaniyanın Lids Universitetinin bir qrup alimi sensasiyalı tapıntı barədə məlumat yaymışdır. Alimlər Qara dənizin dibində Dünya okeanında yeganə yeraltı çay aşkar etmişlər. Çayın uzunluğu 37 dəniz mili, eni isə yarım mildən çoxdur. Suyun axın sürəti saatda 4 mildir (təxminən saatda 7,5 kilometr). Sualtı çayın əmələ gətirdiyi novun dərinliyi 35 metrdir.
Çayın uzunluğu çox olmasa da, bol suludur (saniyədə 22 min kubmetr). Alimlər bildirirlər ki, çay quruda olsaydı, həmin göstəriciyə görə dünyada altıncı yeri tutardı.
Maraqlıdır ki, yeraltı çaya adi çayın bütün elementləri xasdır. Məsələn, onun sahilləri, məcrasında kandarlar və əsl şəlalələr vardır.
Tədqiqatçıların fikrincə, yeraltı çay Mərmərə dənizinin duzlu suyunun Bosfor boğazı ilə Qara dənizin şorluq faizi aşağı olan sularına daxil olması nəticəsində əmələ gəlmişdir. Bu səbəbdən yeraltı çayın suyu çox duzludur.
Bölmənin digər xəbərləri
